Rostov-na-Donu şeerindeki Şimaliy Kavkaz okrugınıñ arbiy mahkemesi Yaltadaki «Hizb ut-Tahrir işi»niñ altı figurantına tevqifni üç ayğa uzattı.
Advokat Emil Kurbedinovnıñ Qırım.Aqiqatqa bildirgenine köre, muhakeme etilgen Emir-Usein Kuku, Refat Alimov, Arsen Cepparov, Vadim Siruk, Muslim Aliyev ve Enver Bekirov tahqiqat izolâtorında ağustos 28-ge qadar qalacaqlar.
Kurbedinov: «İmayemiz altında bulunğanlarğa tevqifni üç ayğa uzattılar. Biz, er vaqıt yapqanımız kibi, ev apisi istep muracaat ettik, lâkin mahkeme bizim delillerimzni esapqa almadı», – dedi.
Öz nevbetinde advokat Edem Semedlâyev, mayıs 23-te qabaatlav tarafı, kompleksli tilşınaslıq-dinşınaslıq mahkeme ekspertizasınıñ materiallarını ilân etmege devam etti, dep bildirdi.
«Prokuror ekspertizanıñ materiallarını ilân etmege devam etti. Zanımızca, artıq bundan soñki oturışuvda biz, onı azırlağan ekspertlerniñ sorğulamasına keçmek içün ilân etüvini yekünley bilirmiz», – dep añlattı o.
2016 senesiniñ fevral-aprel aylarında Yaltada Arsen Cepparov, Refat Alimov, Emir-Useyin Kuku, Muslim Aliyev, Enver Bekirov ve Vadim Siruk yaqalandılar. Olarnı Rusiyede yasaq etilgen «Hizb ut-Tahrir» siyasiy İslâm teşkilâtına alâqalı olğanlarında qabaatlaylar.
Rusiye arbiy mahkemesi Yaltadaki «Hizb ut-Tahrir işi»ni Aqmescitte keçken köçüci oturışuvlarında baqa edi. Ondan soñ tevqif etilgen Qırım sakinlerini Rostov-na-Donu şeerine yolladılar.
Ukraina Tış işleri nazirligi Rusiyeden Yaltadaki «Hizb ut-Tahrir işi» figurantlarınıñ azat etilmesini talap ete.
«Hizb ut-Tahrir» halqara siyasiy İslâm teşkilâtınıñ vekilleri öz vazifesini, bütün musulman devletleriniñ bir İslam hilâfeti içinde birleştirilmesinde köreler. Lâkin olar buña irişmek içün terroristik usullarınıñ qullanılmasını red ete ve Rusiyede aqsız olaraq taqip etilgenlerini aytalar. Rusiyeniñ Yuqarı mahkemesi 2003 senesinde «Hizb ut-Tahrir»ni yasaq etip, «terroristik» tanılğan 15 birleşmeniñ cedveline kirsetti.
«Hizb ut-Tahrir işi» boyunca tevqif ve mahküm etilgen Qırım sakinleriniñ qorçalayıcıları, olarnıñ diniy alâmetke köre taqip etilgenlerini tüşüneler. Advokatlar, Rusiye uquqqoruyıcı organları tarafından bu iş boyunca taqip etilgenlerniñ esasen qırımtatarlar olğanını ve olarnen beraber İslâm dinini kütken ukrainler, ruslar, tacikler, azerbaycanlar ve diger etnik gruppalarğa ait Qırım sakinleriniñ taqip etilgenini qayd eteler. Halqara uquq, işğal etilgen territoriyada işğal etken devletniñ qanunlarını tatbiq etmekni yasaq ete.
