Açlıq ilân etken Aqyardaki «Hizb ut-Tahrir işi» figurantı Nuri Primovnıñ anası Raime Primova, hastahanege alıp barılğan soñ narazılığını toqtatmadı. Bunı iyül 4-te Qırım.Aqiqatqa İnsan aqları boyunca Qırım alâqa gruppasınıñ koordinatorı Abdureşit Cepparov ikâye etti.
Cepparov: «Şimdi o, Aqyarda hastahanede buluna. Onda, eki afta qadar devam etken açlığı münasebetinen zayıflıq bar. Onıñ bundan soñki niyetleri bizge malüm degil, lâkin onıñ özüni tutqanına köre, açlıq toqtatılmadı», – dedi.
Bunıñ arfesinde Raime Primova hastahanege alıp ketildi.
İyün 20-de Qırımda Ukraina vatandaşı, Aqyardaki «Hizb ut-Tahrir işi» figurantı Nuri Primovnıñ anası, 68 yaşlı Raime Primova açlıq ilân etti. O, Rusiye tarafından mahküm etilgen oğlunıñ deñiştirüv cedveline kirsetilmesini talap ete.
Daa soñra oña Ukraina Yuqarı Radasınıñ insan aqları boyunca vekili Denisova müracaat etti.
Raime Primovada ekinci gruppa saqatlığı bar. Primovada bir büyregi yoq. Onda ciger hastalığı tayin etildi.
Mayısnıñ soñunda, Rusiye koloniyasında bulunğan Aqyardaki «Hizb ut-Tahrir işi» figurantı Nuri Primovnı ceza izolâtorına qapadılar.
2017 senesiniñ sentâbrinde Rostov-na-Donudaki Şimaliy Kavkaz okrugınıñ arbiy mahkemesi ükümni ilân etti. Oña binaen, «Hizb ut-Tahrir» işi boyunca qabaatlanğan Aqyar sakinleri Ferat Seyfullayev, Rustem Vaitov ve Nuri Primovğa umumiy rejimli islâh etici koloniyada beşer yıl berildi.
«Hizb ut-Tahrir işi» boyunca tevqif ve mahküm etilgen Qırım sakinleriniñ qorçalayıcıları, olarnıñ diniy alâmetke köre taqip etilgenlerini sayalar. Advokat Emil Kurbedinov, bu iş boyunca Rusiye uquqqoruyıcı organları tarafından taqip etilgenlerniñ esasen qırımtatarlar olğanlarını ve olarnen birlikte İslâm dinini kütken ukrainler, ruslar, tacikler, azerbaycanlar ve diger etnik gruppalarğa ait Qırım sakinleriniñ taqip etilgenlerini qayd ete.
«Hizb ut-Tahrir» halqara siyasiy İslâm teşkilâtınıñ vekilleri öz vazifesini, bütün musulman devletleriniñ bir İslam hilâfeti içinde birleştirilmesi, dep köstereler. Lâkin olar buña irişmek içün terroristik usullarnıñ qullanılmasını red ete ve Rusiyede aqsız yerde taqip etilgenlerini aytalar. 2003 senesinde Rusiyeniñ Yuqarı mahkemesi «Hizb ut-Tahrir»ni, «terroristik» tanılğan 15 birleşmeniñ cedveline kirsetip, yasaq etti.
