Qırımda Raime Primova, Rusiye koloniyasında bulunğan Aqmescitteki «Hizb ut-Tahrir işi» figurantı Nuri Primovnıñ anası, iyün 20-de açlıq ilân etti. Bunı qadın Qırım.Aqiqat muhbirine bildirdi.
Primova: «Oğlumnı azat etmek talaplarına diqqatnı çekmek içün başqa bir yol bilmeyim. O yaqın vaqıtta deñiştirüv cedveline kirsetilgen soñ ya da pek yaramasam açlığımnı toqtatırım. Men ölmek istemeyim, lâkin o, ve onıñ ayatı içün daa çoq qorqam», – dedi Primova.
«Qırım birdemligi» birleşmesiniñ bildirgenine köre, Raime Primova, Rusiye FSBsiniñ Qırım boyunca idaresine «oğlu Nuri Primovnı deñiştirmek talabınen» ariza yazğanını iddia ete. FSBde oña, muracaatına cevap bir ay içinde berilecek, dep cevap berdiler.
«Qırım birdemligi»nde bildirilgenine köre, Raime Primovada saqatlıqnıñ ekinci gruppası bar, o, 68 yaşında. Primovada bir büyregi yoq, ciger hastalığı tayin etildi.
Mayısnıñ soñunda, Rusiye koloniyasında bulunğan Aqyardaki «Hizb ut-Tahrir işi» figurantı Nuri Primovnı ceza izolâtorına qapadılar.
2017 senesiniñ sentâbrinde Rostov-na-Donudaki Şimaliy Kavkaz okrugınıñ arbiy mahkemesi ükümni ilân etti. Oña binaen, «Hizb ut-Tahrir» işi boyunca qabaatlanğan Aqyar sakinleri Ferat Seyfullayev, Rustem Vaitov ve Nuri Primovğa umumiy rejimli islâh etici koloniyada beşer yıl berildi.
«Hizb ut-Tahrir işi» boyunca tevqif ve mahküm etilgen Qırım sakinleriniñ qorçalayıcıları, olarnıñ diniy alâmetke köre taqip etilgenlerini sayalar. Advokat Emil Kurbedinov, bu iş boyunca Rusiye uquqqoruyıcı organları tarafından taqip etilgenlerniñ esasen qırımtatarlar olğanlarını ve olarnen birlikte İslâm dinini kütken ukrainler, ruslar, tacikler, azerbaycanlar ve diger etnik gruppalarğa ait Qırım sakinleriniñ taqip etilgenlerini qayd ete.
«Hizb ut-Tahrir» halqara siyasiy İslâm teşkilâtınıñ vekilleri öz vazifesini, bütün musulman devletleriniñ bir İslam hilâfeti içinde birleştirilmesi, dep köstereler. Lâkin olar buña irişmek içün terroristik usullarnıñ qullanılmasını red ete ve Rusiyede aqsız yerde taqip etilgenlerini aytalar. 2003 senesinde Rusiyeniñ Yuqarı mahkemesi «Hizb ut-Tahrir»ni, «terroristik» tanılğan 15 birleşmeniñ cedveline kirsetip, yasaq etti.
