Rusiyeniñ uquqiy malümat portalında derc etilgen emirlerde, Rusiye prezidenti Vladimir Putin bir qaç Rusiye arbiy qısmına Ukraina ve Belarus şeerlerniñ şerefine fahriy unvanlar berdi, denile.
Emirler iyül 2-de derc etildi.
Vesiqada, fahriy unvanlar türlü qısımlarğa «şanlı askeriy ananelerini saqlap qoymaq, arbiy hadimlerni vatanğa sevgi ve arbiy borcğa sadaqat ruhunda terbiye etmek maqsadınen belidli», dep qayd etile.
Al-azırda Rusiyede bir qaç arbiy qısım şöyle adlandırıldı:
6-ncı gvardiya Lvov tank polku,
68-nci gvardiya Jitomir-Berlin tank polku,
163-nci gvardiya Nejin tank polku,
90-ncı gvardiya tank Vitebsk-Novgorod diviziyası,
856-ncı gvardiya motorlı artilleriya Kobrin polku,
102-nci motorlı tüfek Slonim-Pomeraniya polku,
381-nci gvardiya artilleriya Varşava polku,
400-nci motorlı artilleriya Transilvaniya polku,
144-nci gvardiya Yelnâ motor tüfek diviziyası,
150-nci İdritsa-Berlin motorlı tüfek diviziyası,
933-nci Verhnedneprovsk zenit-raketa polku.
Ondan ğayrı emirde, unvanlrda Ukraina, Belarus ve Avropa şeerleriniñ adları, bu şeerlerniñ «Ulu vatan cenki» yıllarında azat etilmesini hatırada ebediyen qaldırmaq içün añılalar, denile.
2018 senesi aprelniñ başında Ukraina mudafaa naziri Stepan Poltorak, Rusiye Ukraina ile sıñırında 77 000-den ziyade kişilik 19 birinci ve ekinci eşelon batalyon taktik gruppasını topladı, dep bildirdi. Bir gruppirovkağa biñge yaqın tank, 2,3 biñ arbiy maşina, 1,1 biñden ziyade artilleriya sisteması ve 400-ge yaqın çoq namlulı raketa sistemaları kire.
Daa evel Ukrainadaki NATO ofisi mudiriniñ muavini Ann-Kristin Bergene, Qırımnıñ arbiyleştirilmesi ve Qara deñiz bölgesinde Rusiye arbiy bulunuvınıñ kenişletilmesi munasebeti ile endişe bildirdi.
2018 senesinde Aqyardaki Fiolent burnunda S-400 «Triumf» ava mudafaası zenit-raketa kompleksleri arbiy nevbetke turdı.
2014 senesinde Qırım ilhaq etilgen soñ Rusiye yarımadada muntazam surette arbiy talimlerni yaptıra. Ukrainanıñ Baş ştabında, Rusiyeniñ Qırımdaki areketlerine qanunsız deyler.
.
