Rysiyeniñ adliyesi, «fevral 26 işi»niñ beş figurantına yarımadanıñ ilhaqından evel olıp keçken vaqialar içün Rusiye qanunları boyunca şartlı müddetler berip, «varvarlıq adetlerine qayttı» ve «Rusiyeni medeniy devletler sırasından çıqardı». Bu fikirni Qırım.Aqiqat Radiosı efirinde sovet dissidenti, Rusiye aq-uquq qorçalayıcısı, jurnalist ve cemyet erbabı Aleksandr Podrabinek bildirdi.
Aq-uquq qorçalayıcısı: «Bu davada Rusiye adliyesi öz-özüne üküm çıqardı, çünki o, qullanıluvdan çoqtan berli çıqqan uquq normalarını qullandı. İnsanlarnı, o vaqıt mevcut olmağan qanunlar boyunca muhakeme etmek – bu, varvarlıq adetlerine qaytuv… Bu üküm Rusiyeni medeniy devletler sırasından çıqara», – dep qayd etti.
Aleksandr Podrabinek, fikrince, Rusiye ükümeti qanunsız qabaatlavğa qasten yol berdi, dep ilâve etti.
«Bu mahkeme Rusiye ükümetine, Qırımda vaziyetini pekitmek ve er keske, hususan qırımtatarlarğa, evde kim şorbacı olğanını ve bu repressiv rejimni begenmegenlerge ne olacağını köstermek içün kerek edi. Ükümetniñ, yarımadada siyasiy mevcudiyetini pekitmek içün er angi qanunnı, uquqnıñ er türlü temel normalarını boza bilecegini köstermek içün», – dep yekün çekti o.
Mevzuğa dair: «Fevral 26 işi» boyunca mahküm etilgenler: olar kim?
İyün 19-da Kremlniñ kontroli altında olğan Aqmescitniñ Merkeziy rayon mahkemesi «fevral 26 işi» figurantlarını şartlı apis müddetlerine mahküm etti. Ali Asanov ve Mustafa Degermenci 4 yıl ve 6 ay şartlı apis müddetine, Arsen Yunusov ve Eskender Kantemirov 4 yıl şartlı apis müddetine ve Eskender Emirvaliyev 3 yıl ve 6 ay şartlı apis müddetine mahküm etilip, episine 3-er yıl sınav müddeti tayin etildi.
2014 senesi fevral 26-da Qırım parlamentiniñ binası ögünde Ukrainanıñ topraq bütünligine qol tutqanlar ve qarşı çıqqanlarnıñ keniş mıqyaslı mitingi keçti. Birinciler sırasında qırımtatarlar ve Ukraina tarafını tutqan faaliyetçiler buluna edi. Olarğa qarşı Rusiyeniñ tarafını tutqan faaliyetçiler çıqtı. Olar, şimdi Rusiyege tabi Qırım ükümetiniñ başında turğan Sergey Aksönov başlığındaki «Rus birligi» liderleri tarafından teşkil etilgen ediler.
2015 senesiniñ yanvarinde Rusiye Tahqiqat komitetiniñ Qırım idaresi fevral 26 mitingi esnasındaki kütleviy qarışıqlıqlar boyunca cinaiy iş açtı.
Yaqalanğanlar arasında Ukrainanıñ topraq bütünligine qol tutqanlardan: Qırımtatar Milliy Meclisi reisiniñ muavini Ahtem Çiygoz ve, ondan ğayrı, faaliyetçiler Ali Asanov, Mustafa Degermenci, Eskender Kantemirov, Talât Yunusov, Eskender Emirvaliyev, Arsen Yunusov ve Eskender Nebiyev buluna ediler.
Daa soñra mahkeme, baş şübheli – o vaqıt Qırımda amelde Meclis lideri rolüni eda etken Ahtem Çiygoznı ayrı bir mahkeme davasına ayırıp, «fevral 26 işi»ni ekige böldi.
Advokat Cemil Temişevniñ teşebbüsi ile faaliyetçi Talât Yunusov ve ATR telekanalınıñ operatorı Eskender Nebiyev, bergen ifadeleriniñ «fevral 26 işi»niñ diger figurantlarına qarşı delil olaraq qullanılmaycağını şart qoyıp, tahqiqatnen añlaşma yaptı ve özlerine qarşı qabaatlavlarnı tanıdılar. 2015 senesinde Talât Yunusovğa şartlı olaraq 3,5 yıl ve Eskender Nebiyevge, aynı bunıñ kibi, şartlı olaraq 2 yıl ceza müddeti berildi..
2017 senesi sentâbr 11-de Rusiye mahkemesi Çiygoznı, yarımadanıñ Rusiye tarafından ilhaqı ile bağlı narazılıqlarnı közde tutqan «kütleviy qarışıqlıqlar»nıñ teşkil etilmesinde qabaatlav boyunca sert rejimli koloniyada sekiz yıl apis cezasına mahküm etti. 2017 senesi oktâbr 25-te Rusiye ükümeti, Qırımda mahküm etilgen Ahtem Çiygoznı azat etip, Türkiyege teslim etti. Daa soñra o, Kyivge keldi.
