Kremlniñ kontroli altında olğan Qırım Yuqarı mahkemesi, mayıs 21-de Bağçasarayda yaqalanğan qırımtatar faaliyetçisi Server Mustafayevniñ advokatı tarafından tevqif müddetiniñ uzatılmasına qarşı berilgen şikâyetni red etti. Bunı iyün 14-te «Qırım birdemligi» birleşmesi bildire.
Birinci maqam mahkemesiniñ, tevqif müddetiniñ ağustos 9-ğa qadar uzatılmasına dair qararı quvette qaldırıldı.
Mayıs 21-de Rusiye telükesizlik hadimleri Bağçasarayda «Qırım birdemligi» birleşmesiniñ koordinatorı Server Mustafayevniñ ve Bağçasaray rayonındaki Topçıköy (Dolinnoye) köyünde Edem Smailovnıñ evlerini tinttiler.
Azatlıq Radiosı muhbiriniñ malümatına köre, Mustafayev «Hizb ut-Tahrir işi» boyunca yaqalandı. Onı mahkemege qadar vaqtınca tutuluv izolâtorına apis ettiler.
Rusiye FSBsi, Qırımda «Hizb ut-Tahrir» teşkilâtında iştirak etkenlerinden şübheli tanılğan eki şahıs yaqalandı, dep bildirdi. Yaqalanğanlarnıñ adları bildirilmey.
İlhaqtan soñ Qırımdaki faktik Rusiye ukümeti mustaqil jurnalistler, vatandaş faaliyetçileri, Qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqaları bar dep şübheli sayılğan Qırım musulmanlarınıñ evlerinde muntazam surette kütleviy tintüvler keçire.
