Kremlniñ kontroli altında olğan Kiyevskiy rayon mahkemesi, mayıs 21-de Bağçasarayda yaqalanğan qırımtatar faaliyetçisi Server Mustafayevge sıñırlav tedbiriniñ saylanması boyunca qapalı oturışuvını keçire.
Qırım.Aqiqat muhbiriniñ bildirgenine köre, mahkemege yalıñız yaqalanğannıñ üç aqrabasını yiberdiler. Onıñ menfaatlarını advokat Sergey Legostov qorçalay.
Mahkeme yanında 200-ge yaqın kişi toplaştı, Rusiye polisiniñ üç maşinası ve Rusiye gvardiyasınıñ askerleri seçildi.
Mayıs 21-de Rusiye telükesizlik hadimleri Bağçasarayda «Qırım birdemligi» birleşmesiniñ koordinatorı Server Mustafayev ve Bağçasaray rayonınıñ Topçıköy (Dolinnoye) köyünde Edem Smailovnıñ evlerini tintti.
Azatlıq Radiosı muhbiriniñ malümatına köre, Mustafayevni «Hizb ut-Tahrir işi» boyunca yaqaladılar, onı mahkemege qadar vaqtınca tutuluv izolâtorına yerleştirdiler.
Rusiye FSBsi, Rusiye ve ilhaq etilgen yarımadada yasaq etilgen «Hizb ut-Tahrir» teşkilâtında iştirak etkenlerinden şübhe etilgen eki kişiniñ Qırımda yaqalanğanını bildirdi. Yaqalanğanlarnıñ adları bildirilmedi.
İlhaqtan soñ Qırımdaki faktik Rusiye akimiyeti mustaqil jurnalistler, vatandaş faaliyetçileri, Qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.
