Mayıs 21-de saba Bağçasarayda yaqalanğan qırımtatar faaliyetçisi Server Mustafayevni mahkemege qadar vaqtınca tutuluv izolâtorına yerleştirecekler. Mahkemede ise oña sıñırlav tedbiri saylana bilecek.
Azatlıq Radiosındaki rus hizmetiniñ muhbiri Anton Naumlükniñ Facebookta bildirgenine köre, Mustafayevni, Rusiye Cinaiy kodeksiniñ 205.5 maddesiniñ 2-nci qısmı (terroristik teşkilâtta iştirak etüv) boyunca iş açılğanı aqqında ve oña qarşı qabaatlavlarnıñ (Rusiyede ve onıñ tarafından ilhaq etilgen Qırımda yasaqlanğan) «Hizb ut-Tahrir işi» ile birleştirilmesi aqqında eki qarar ile tanıştırdılar.
Muhbirniñ malümatına köre, Mustafayevge dair şübhe, onıñ 2016 senesi dekabr 2-de Bağçasaraynıñ 6-nci mikrorayonında bulunğan camideki körüşüvi aqqında malümatqa esaslana. Qırımtatar faaliyetçisi şübhelerni esassız sayğanını qayd etti. O, Rusiye Anayasasınıñ 51-nci maddesine atıfta bulunıp, ifade bermekten vazgeçti.
Bildirilgenine köre, mayıs 22-ge Kremlniñ kontroli altında olğan Kiyevskiy rayon mahkemesiniñ Mustafayevge qarşı sıñırlav tedbiriniñ saylanması boyunca oturışuvı planlaştırıldı.
Mayıs 21-de Rusiye telükesizlik hadimleri Bağçasarayda «Qırım birdemligi» birleşmesiniñ koordinatorı Server Mustafayev ve Bağçasaray rayonınıñ Topçıköy (Dolinnoye) köyünde Edem Smailovnıñ evlerini tintti.
Daa soñra Rusiye FSBsi, Rusiye ve ilhaq etilgen yarımadada yasaq etilgen «Hizb ut-Tahrir» teşkilâtında iştirak etkenlerinden şübhe etilgen eki kişiniñ Qırımda yaqalanğanını bildirdi.
İlhaqtan soñ Qırımdaki faktik Rusiye akimiyeti mustaqil jurnalistler, vatandaş faaliyetçileri, Qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.
