Rusiyeniñ Qırım boyunca Tahqiqat komiteti, Qırımtatar Milliy Qurultayı azası Asan Egizniñ imayesiniñ ricası ile, onıñ alıp qaçılğan yerinde mayıs 23-te GİBDD (Yol areketiniñ telükesizligi devlet inspektsiyası) hadimleriniñ olıp olmağanını tayin ete. Bunı mayıs 25-te Qırım.Aqiqat Radiosınıñ efirinde advokat Ayder Azamatov bildirdi.
Advokat: «Asannı Tahqiqat komitetinde eki saat qadar sorğuladılar: birisini kördimi, olardan birini tanıp olurmı… Bilgenim qadarı ile, GİBDDge, o vaqıt o yerde hadimleriniñ ihtimal ile devriye kezmelerine dair bir qaç malümat talabı ile muracaat ettiler. Biz şimdilik eminliknen bir şey aytıp olamaymız», – dep ikâye etti.
Mayıs 23-te Aqmescit rayonındaki Colman (Pionerskoye) köyü yanında belli olmağan uniformalı şahıslar Qırımtatar Milliy Qurultayı delegatı Asan Egizni yaqaladılar. Rusiye FSBsiniñ Qırımdaki idaresinde Egizniñ yaqalağanlarını inkâr ete ediler. Daa soñra alıp qaçılğan Egiz kötek izleri ile ormanda tapıldı.
Ukraina Tış işleri nazirligi ilhaq etilgen Qırımnıñ Aqmescit rayonında Asan Egizniñ alıp qaçılmasını taqbih etti.
Açıq menbalarda Rusiye telükesizlik hadimleri tarafından bu hususta berilgen izaatlar yoq.
İlhaqtan soñ Qırımdaki faktik Rusiye akimiyeti mustaqil jurnalistler, vatandaş faaliyetçileri, Qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler keçire.
