Qırımnıñ Aqmescit rayonı Colman (Pionerskoye) köyünde Rusiye küç idaresiniñ hadimleri Qırımtatar Milliy Qurultayınıñ delegatı Asan Egizni tutıp alğanlar, dep haber etti Qırımtatar Milliy Meclisiniñ reisi Refat Çubarov.
«Mavı signal ışığı yanıp turğan ve ses cihazlarınen donatılğan Wolksvagen maşnasında rus aydutları, dümeni başında Qırımtatar Milliy Qurultayınıñ delegatı Asan Egiz olğan maşnanı toqtamağa mecbur eteler. Toqtatılğan şahıs Asan Egiz olğnından emin olğan soñ, rus aydutları onı öz maşnasınen belli olmağan yönelişke alıp keteler», – dep yaza Çubarov.
Çoqqa barmay vaqia yerine yetip kelgen Asannıñ ağası, Qırımtatar Milliy Meclisiniñ azası Abduraman Egiz «artıq Asannıñ maşnası da coyulğanını köre».
Çubarovnıñ malümatına köre, al-azırda Abduraman Egiz qardaşını qıdırıp Qırımdaki Rusiye FSB idaresine ketken.
Qırımlı adliyeci Ayder Azamatovnıñ malümatına binaen Egizniñ maşnasını «mavı signal ışığı yanıp turğan kümüş tüslü, tahminen DPSke ait Wolksvagen maşnası toqtatqan».
Rusiye küç idaresi hadimleriniñ bu hususnen bağlı daa bir açıq izaatı yoq.
«Asan artıq körip olamağan, amma bu vaqianı yani onıñ boş maşnası ve yanında turğan DPS maşnasını körgen şaat bar. Şaat, maşna Egizge ait olğanını añlağan. Şimdi men bulvar Frankoda FSB idaresi yanında turam. Er zamanda olğanı kibi maña: mında bu şahıs ketirilmedi, şimdi mında Asannıñ aqrabaları kelir, - dediler», – dep ikâye etti Azamatov Qırım.Aqiqat muhbirine.
Rusiye Qırımnı ilhaq etken soñ, mustaqil jurnalistler, cemaat ve qırımtatar milliy areketiniñ faalleri, qırımtatar Milliy Meclisiniñ azaları ve Rusiyede yasaqlanğan «Hizb ut-Tahrir» ile alâqaları olğanında şeklengen musulmanlarnıñ evlerinde sıq-sıq tintüvler keçirilip başladı.
