Rusiye FSBsiniñ ilhaq etilgen Qırımdaki idaresi Qırımtatar Milliy Qurultayı delegatı Asan Egizniñ yaqalağanını inkâr ete. Bunı mayıs 23-te Qırım.Aqiqatqa Egizniñ qıdırılması ile oğraşqan advokat Ayder Azamatov bildirdi.
Azamatov: «Biz FSBniñ baş idaresine bardıq. Bizge ağzaviy şekilde onıñ olmağanını ve bugün ketirmegenlerini söylediler. Biz ariza qaldırdıq ve şimdi (saat 16:50-deki vaziyetke köre – QA) «E-Merkezi»ne ketemiz, belki anda bilirmiz. Anda da olmasa, GİBDDge (Yol areketiniñ telükesizligi devlet inspektsiyası) baracaqmız – belki anda nasıldır malümat bar», – dedi.
Mayıs 23-te Aqmescit rayonındaki Colman (Pionerskoye) köyü yanında Qırımtatar Milliy Qurultayı delegatı Asan Egiz yaqalandı. Rusiye telükesizlik hadimleri tarafından açıq menbalarda bu hususta izaatlar berilmedi.
İlhaqtan soñ Qırımdaki faktik Rusiye akimiyeti mustaqil jurnalistler, vatandaş faaliyetçileri, Qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.
