İnformatsion siyaset naziriniñ birinci muavini Emine Ceppar, mayıs 22-de keçken Amerika memurları ve diplomatları ile körüşüvde, «mahsus informatsion operatsiyalarnıñ faal surette tatbiq etilmesi ile hibrid cenk yapılğan» Qırımda insan aqlarınıñ bozuluvı aqqında ikâye etti.
Bunı Ukraina İnformatsiya nazirliginiñ matbuat hizmeti bildire.
Nazirniñ birinci muavini: «Rusiye propagandası, dünya toplulığını status-kvo ile barıştırmaq içün, Qırımda arbiy areketlerniñ olmağanını urğulay. Milletçiler, faşistler, ekstremistler ve terroristler ile küreşniñ numayış etilmesine Kremlniñ talabı olğanda – «uquqqoruyıcılar» dep adlandırılğanlar işğal etilgen yarımadada böyle insanlarnı elbette tapalar», – dep qayd etti.
O, memuriy sıñırda alıp qaçılğan Harkiv sakini Aleksandr Steşenkonıñ taqdiri aqqında ikâye etti. FSB onı, Qırımtatar Milliy Meclisiniñ sımarışı ile yarımadada terroristik aktlar azırlağanında qabaatlay.
Ceppar: «Ustalıq ile yapılğan sahte resim, bir çoq vazifelerniñ becerilmesi içün qullanıla: Qırım sakinleriniñ dört yıldan berli içinde yaşağan qorqularını saqlap qaluv, «ekstremizm ve terrorizm»ni faş etüv ve uquqqoruyıcı organlarnıñ tışqı «duşman» ile küreşüv boyunca işi, ealiniñ diqqatını içki problemaldan çeküv», – dep qayd etti.
Mayıs 21-de Rusiye FSBsi, sanki Qırımda, Ukraina Yuqarı Radası deputatı Mustafa Cemilevnıñ yardımcısı Erol Veliyev tarafından «Refat Çubarovnıñ emiri boyunca ve SBUnıñ qol tutuvı ile» meydanğa ketirilgen ekstremist gruppasınıñ areketini toqtattı, dep bildirdi.
Rusiyeniñ versiyasına köre, Harkivde teşkil etilgen gruppağa Veliyevden ğayrı «sabıq boksçu sprotçular» Steşenko ve Tretyakov kirdiler.
FSB, Steşenkonı 2018 senesiniñ aprelinde «Qırım territoriyasına kirgende» yaqalağanını ve «onıñ anda Veliyev tarafından provokatsiyalar azırlamaq ve amelge keçirmek içün yollanılğanını» bidlirdi. Rusiye Veliyev ve Tretyakovğa qarşı qabaatlavnı ğiyabiy şekilde çıqardı, olar «federal qıdırıluv cedveline kirsetildi».
Ukraina telükesizlik hizmeti, Rusiye FSBsiniñ, ilhaq etilgen Qırımda Ukrainanıñ mahsus hizmetleri yardımınen «ekstremist gruppasınıñ meydanğa ketirilmesi» aqqında malümatı kerçekke uymay, dep bildirdi.
Aprel 12-de «Qırım SOS» cemiyet teşebbüsiniñ faaliyetçileri, Harkiv sakini, ukrain Aleksandr Steşenkonıñ anasına atıfta bulunaraq, Rusiye telükesizlik hadimleriniñ onı «Çongar» keçirüv noqtasında Rusiye tarafından ilhaq etilgen Qırımğa kirgende yaqalağanlarını bildirdiler. Rusiye polisiniñ hadimleri tarafından berilgen raportlarğa binaen, aprel 12-de Steşenkonı «qanuniy talapqa boysunmağanı içün yaqaladılar» (Rusiye Memuriy cinayetler kodeksi, madde 19.3). Aynı şu künü Aqmescitteki Jeleznodorojnıy rayon mahkemesi Steşenkonı 12 künge tevqif etti.
Aprel 24-te Steşenkonı memuriy cezalarnı çekken şahıslar içün mahsus qabul etüv yerinden (spetspriyomnikten) belli olmağan tarafqa alıp kettiler. Daa soñra advokat Ayder Azamatov Harkiv sakininiñ alıp qaçılması aqqında bildirdi.
Qırım Rusiye tarafından ilhaq etilgen soñ FSB yarımadada mustaqil jurnalistler, qırımtatar faaliyetçileri, muhalefet ve Ukrainanıñ tarafdarı olğan cemiyet erbapları ve diniy azlıqlarnıñ vekillerine qarşı muntazam surette yaqalavlar, tintüvler ve sorğular teşkil ete. Aq-uquq qorçalayıcıları Rusiye telükesizlik hadimleriniñ bu areketlerine, siyasiy motiv ile yapılğan areketler, deyler.
