Link açıqlığı

Saatnıñ esas haberi

Qırımda advokat, poliske Harkiv sakini Steşenkonıñ alıp qaçılması aqqında ariza berdi


Ayder Azamatov
Ayder Azamatov

Advokat Ayder Azamatov ilhaq etilgen Qırımnıñ Rusiye polisine, aprel 24-te Aqmescitteki spetspriyomnikten (mahsus qabul etilüv yerinden) belli olmağan tarafqa alıp ketilgen Harkiv sakini Aleksandr Steşenkonıñ alıp qaçılması aqqında ariza berdi. Bunı imayeci mayıs 8-de özüniñ Facebooktaki saifesinde yazdı.

Bidirüvde: «Poliske Steşenko Aleksandrnıñ alıp qaçılması aqqında ariza yolladım. Söz kelimi, onıñ soñki kere körülgen ve belli olmağan şahıslar tarafından alıp qaçılğan yeri, arizam berilgen polis bölüginden 5 metr uzaqlığında buluna. Tertip qorçalayıcılarnıñ «burnu tübünden» çalalar», – denile.

Daa evel Azamatov Qırımdaki Rusiye polisine Steşenkonıñ ğayıp olması aqqında ariza bergen edi.

Aprel 12-de «Qırım SOS» cemiyet teşebbüsiniñ faaliyetçileri, Harkiv sakini, ukrain Aleksandr Steşenkonıñ anasına atıfta bulunaraq, Rusiye telükesizlik hadimleriniñ onı «Çongar» keçirüv noqtasında Rusiye tarafından ilhaq etilgen Qırımğa kirgende yaqalağanlarını bildirdiler.

Rusiye polisiniñ hadimleri tarafından berilgen raportlarğa binaen, aprel 12-de Steşenkonı «qanuniy talapqa boysunmağanı içün yaqaladılar» (Rusiye Memuriy cinayetler kodeksi, madde 19.3).

Aynı şu künü Aqmescitteki Jeleznodorojnıy rayon mahkemesi Steşenkonı 12 künge tevqif etti. Advokat Ayder Azamatov, protokolğa köre, Harkiv sakini advokatnıñ hizmetinden vazgeçti, qabaatını tanıdı ve memuriy mesüliyetke çekilgeni aqqında mahkeme qararınıñ kopiyasını aldı, dep qayd ete.

Aprel 24-te Steşenko, memuriy cezalarnı çekken şahıslar içün mahsus qabul etilüv yerinden belli olmağan tarafqa alıp ketildi.

2017 senesiniñ oktâbrinde BMTde, Qırımda insan aqları saasındaki vaziyet «Rusiye işğali neticesinde bayağı fenalaştı», dep bildirdiler. Ayrıca, közeticiler tevqifler ve yaqalanuvlar, zornen alıp qaçuvlar, merametsiz munasebet kösterüv ve eziyetlevlerni vesiqalaştırdılar.

XS
SM
MD
LG