Ukraina prezidenti Petro Poroşenko, 90 yaşında vefat etken qırımtatar milliy areketiniñ faaliyetçisi Nuriye Biyazovanıñ hatırasını ürmetnen añdı.
Ukraina devletiniñ başlığı özüniñ Facebooktaki saifesinde: «Bugün qırımtatar milliy areketiniñ faaliyetçisi, aqiqat ve adalet oğrunda küreşçi Nuriye Biyazova ebediy dünyağa ketti. 1944 senesinde Nuriye sürgün etüvni başından keçirdi, yıllar keçken soñ tuvğan Qırımına qaytıp, dünyağa facialı vaqialar aqqında ikâye etti», – dep yazdı.
Mayıs 20-de Qırımdaki Qarasuvbazar şeerinde 90 yaşında qırımtatar milliy areketiniñ veteranı Nuriye Biyazova keçindi.
Bu seneniñ baarinde Nuriye Biyazova 1944 senesinde qırımtatar halqınıñ sürgün etilmesi aqqında «Akis» («Otrajeniye») adlı avtobiografik kitap çıqardı.
Nuriye Biyazova 1928 senesi fevral 21-de Bağçasarayda doğdı. 1944 senesi mayıs 18-de Özbekistanğa sürgün etildi. Daa soñra anda ana-babasını ve eki qız qardaşını defin etti. 1989 senesinde Qırımğa qaytıp, o yerde qırımtatar milliy areketiniñ faaliyetçisi oldı.
