Bu yıl 90 yıllıq yubileyni qayd etken qırımtatar milliy areketiniñ veteranı Nuriye Biyazova 1944 senesinde qırımtatar halqınıñ sürgün etilgeni aqqında avtobiografik kitap çıqardı. Bunı Qırım.Aqiqat muhbiri bildire.
Kitapnıñ muellifi: «Qaytqanımıznen men bu kitapnı yazmağa qarar berdim. Bu, şahsiy hatıralarıma esaslanğan tarihiy material. Metin birinci kere gazetada çıqtı, bu yıl ise kitap neşir etildi. Men nesillerimizniñ, sürgünlikte qırımtatarlarnıñ başına kelgen bütün sınavlar aqqında bilgenlerini, aqılğa sığmağan yoqsulluq ve halqımız bergen qurbanlar aqqında hatırlağanlarını isteyim», – dep ikâye etti.
Biyazova yazğan kitapnıñ adı «Akis», tirajı – 200 nusha.
Nuriye Biyazova 1928 senesi fevral 13-te Bağçasarayda doğdı. O, 1944 senesi mayıs 18-de Qırımdan Özbekistanğa sürgün etildi. 1989 senesinde Biyazova Qırımğa qayttı ve qırımtatar milliy areketine qoşuldı.
Qırımdan qırımtatar halqınıñ sürgüni qurbanlarını hatırlama künü er yıl mayıs 18-de qayd etile. Bu künde qırımtatarlar ile tolu birinci eşelon Orta Asiyağa yollanılğan edi. Umumen 180 biñden ziyade kişi sürgün etilgen edi.
