AFCde Ukraina elçisi Andrey Melnik, Qırımtatar halqını sürgün etüv qurbanlarınıñ hatıra kününde Almaniya qırımtatar halqı ile birdemliktedir, dedi.
Diplomat videomuracaatında, «qırımtatar halqı çekken azaplar alman cemiyetinde ketken sayın daa keniş aks-sada doğuracaqlarına; Almaniyanıñ, insan aqları, qırımtatarlarda olğan aqlarnıñ saqlanmasını ve Meclisniñ öz işini ğayrıdan başlay bilmesini talap etecegine» umüt etkenini bildirdi.
Andrey Melnikniñ malümatına köre, kelecek aftada Qırımtatar Milliy Meclisi reisiniñ muavini Ahtem Çiygoz Berlinge kelecek. Anda federal kantslerniñ muessisesi ve Bundestagda (Almaniya Federal Cumhuriyetiniñ parlamenti – QA) umumiy körüşüvler yapılacaq.
Melnik muracaatında: «Biz, Qırımnıñ qanunsız ilhaqı mevzusınıñ bu devletniñ kün tertibinde qalması içün Almaniy ukümeti, alman cemiyetine minnetdarmız. Rusiye tarafından ilhaq etilgen Qırımda saylav dep bilingen ceryanğa celp etilgenlerge qarşı yaqında qoşma sanktsiyalarnıñ tatbiq etilmesi içün minnetdarmız. Biz, Almaniyanıñ Rusiye tarafından Keriç köprüniñ qanunsız qurulmasını taqbih etkeni içün minnetdarmız. Almaniya ukümetiniñ em evelden, em kelecekte: Qırımnıñ ilhaqı iç bir vaqıt tanılmaycaq, degen noqtai-nazarına açıqtan qoşulğanı, pek muimdir», – dedi.
Mayıs 18-de Ukraina ve dünyada 1944 senesinde qırımtatar halqınıñ Qırımdan sürgün etilmesi qurbanlarını hatırlaylar. Bu künde qırımtatarlar ile tolu birinci eşelon Orta Asiyağa yollanılğan edi. Umumen 180 biñden ziyade kişi sürgün etildi.
Qırımnıñ türlü şeerlerinde qırımtatar halqınıñ Qırımdan sürgün etilmesi qurbanlarınıñ hatırasına matem tedbirleri keçe.
Ukraina Yuqarı Radasınıñ qararına binaen, mayıs 18 künü Qırımtatar halqınıñ genotsidi qurbanlarınıñ hatıra künü dep ilân etildi.
