Rusiye, Özbekistan ve Qazaqstan, 1944 senesi qırımtatar ve diger halqlarnı sürgün etüvniñ Ukraina tarafından yapılğan tahqiqatnı nazar-itibarğa almaylar. Bunı Qırım.Aqiqat Radiosı efirinde Qırım Muhtar Cumhuriyeti prokurorınıñ muavini Nikolay İvanets bildirdi.
Prokurornıñ muavini: «Biz 2017 senesinde demografik ekspertizanıñ yapılmasını tamamladıq ve tarihiy-uquqiy ekspertizanı başladıq. Üç devlet – Rusiye, Özbekistan ve Qazaqstanğa halqara avaleler yolladıq. Tahqiqat, qırımtatarlardan qararnen 65%-iniñ, altı Özbekistan vilâyetine yollanılğanını tayin etti. Biz ale daa cevaplar almadıq. Halqara avaleler becerilmeyip qaldı», – dedi.
2015 senesinde QMC Prokuraturası sovet ukümeti tarafından yarımadadan qırımtatar ve diger tamır halqlarınıñ zornen sürgün etilmesi vaqiası boyunca cinaiy işniñ tahqiqatını başladı. Tahqiqatçılar, Ukrainanıñ 300 kitaphanesi ile emekdaşlıq yapıp, yüzlernen neşirler, ilmiy maqaleler ve sovet devri vesiqalarını tetqiq eteler.
Mayıs 18-de Ukraina ve dünyada 1944 senesinde qırımtatar halqınıñ Qırımdan sürgün etilmesi qurbanlarını hatırlaylar. Bu künde qırımtatarlar ile tolu birinci eşelon Orta Asiyağa yollanılğan edi. Umumen 180 biñden ziyade kişi sürgün etildi.
Qırımnıñ türlü şeerlerinde qırımtatar halqınıñ Qırımdan sürgün etilmesi qurbanlarınıñ hatırasına matem tedbirleri keçe.
Ukraina Yuqarı Radasınıñ qararına binaen, mayıs 18 künü Qırımtatar halqınıñ genotsidi qurbanlarınıñ hatıra künü dep ilân etildi.
