Link açıqlığı

Saatnıñ esas haberi

İAAM Qırımda ve Donbassta insan aqlarınıñ bozuluvı aqqında işlerni Büyük odağa teslim etti


İnsan aqları boyunca Avropa mahkemesiniñ (İAAM) Odası, Qırımda ve Donbassta insan aqlarınıñ bozuluvı boyunca dört işni Büyük odağa teslim etti. Bu aqta İAAMnıñ saytında bildirile.

Bildirüvde: «Ukraina tarafından Rusiyege qarşı berilgen dört devletlerara arizanı baqqan İnsan aqları boyunca Avropa mahkemesiniñ Odası, olar üstündeki yurisdiktsiyasından Büyük oda menfaatına vazgeçmege qarar berdi», – denile.

Teslim etilgen işlerde Ukraina Rusiyeni ve Rusiye tarafından kontrol etilgen silâlı gruppalarnı İnsan aqları boyunca Avropa konventsiyasınıñ bozuluvlarında qabaatlay. Ayrıca, arizalar bir qaç madde ve şu cümleden 2-nci madde (ayat aqqı), 3-nci madde (eziyetlevler ve insaniyetsiz ya da menlikni aşalağan munasebet), 5-nci madde (azatlıq ve telükesizlik aqqı) ve 6-ncı madde (adaletli muhakeme aqqı) boyunca berilgen ediler.

İlk eki iş 2017 senesi fevral 27-den başlağan vaqialar ile alâqalı olıp, bu muddet içinde Rusiye Qırımnı ilhaq etti ve, ondan ğayrı, separatistler ve silâlı gruppalarnı kontrol etip, «Donbassta tecavuzkâr silâlı areketlerni ömürge keçirdi ve bu, Konvetsiyanıñ çoq sayılı bozuluvlarına sebep oldı».

Diger eki iş, Qırımda ve şarqiy Ukrainada 2014 senesiniñ sentâbrinden soñ olıp keçken vaqialarnen bağlı. Ukrainanıñ ukümeti, Rusiye Qırımnı öz kontroli altına aldı ve, separatistler ile silâlı gruppalarnı kontrol etip, aqiqatta Donetsk ve Luhansk rayonlarını öz kontroli altında tuta ve, demek ki, o, bu bölgelerdeki Konvetsiyanıñ çoq sayılı bozuluvları içün mesüliyetlidir, dep iddia ete.

Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalarnı qullandı. Rusiye, yarımadanı işğal etkenini red etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevral 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.

XS
SM
MD
LG