Qırım memurları, kütle yaratmaq maqsadınen, Qırımnıñ Rusiyege tabi ukümeti tarafından Bağçasarayda teşkil etilgen Hıdırlez bayramına adamlarnı kelmege mecbur ete ediler. Bunı Qırım.Aqiqat Radiosınıñ efirinde Qırım tarihçısı Gülnara Abdullayeva ikâye etti.
Abdullayeva: «Mıqyasnı köstermek, kelgen insanlarnıñ sayısını qabartmaq içün adamlarnı aselet ketire ediler. Aliy oquv yurtlarından em studentlerni, em ocalarnı aydap toplay ediler. İşten çıqarmalarına barğance, er şey cedvel boyunca… İnsanlar mecbur, olar işni coymaqtan qorqa. Olarnıñ arasında, qayd etilmege, amma soñundan bir yol tapıp andan ketmege mecbur olğan tanışlarım da bar edi», – dedi.
Onıñ aytqanına köre Hıdırlez qırımtatarlarnıñ bayramı olsa da, bu yıl onda qırımtatarlar aman-aman yoq edi.
Tarihçı: «Bu, Orta Asiya ve Şimaliy Kavkaznıñ vekilleri edi», – dedi.
Bu yıl Qırımnıñ Rusiyege tabi ukümeti Bağçasarayda, 2016 senesinde Rusiye polisi uniformasını kiygen belli olmağan şahıslar tarafından yaqalanıp alıp ketilgen qırımtatar faaliyetçisi Ervin İbragimov alıp qaçılğan yerde Hıdırlez bayramını teşkil etti.
Devlet Dumasınıñ deputatı Ruslan Balbek bütün tedbir bitken soñ, bayram şeñliklerinde 55 biñ kişi iştirak etti, dep ilân etti. Deputat, esaplarını nege esaslandırğanını, añlatmadı.
Hıdırlez – türkiy halqlarınıñ eñ büyük bayramlarından biri. XIX asırda onıñ şeñlikleri üç kün devam ete edi.
2016 senesiniñ mayısında Bağçasarayda belli olmağan şahıslar Dünya Qırımtatar Kongressi icra komitetiniñ azası Ervin İbragimovnı alıp qaçtılar. Videoközetüv kamerası, Rusiye yol inspektorları uniformasını kiygen eki kişiniñ, İbragimovnıñ maşinasını toqtatıp, özüni öz mikroavtobuslarına zornen kirsetkenlerini qayd etti.
Qırım insan aqlarını qorçalav gruppası, bu alıp qaçuvnıñ Rusiye ukümeti ya da onıñ kontroli altında olğan paramilitar gruppalar tarafından kerçekleştirilgenini tahmin ete.
