Rusiyege tabi Qırım ukümeti mayıs 5-te Bağçasarayda, 2016 senesinde Rusiye polisi uniformasını kiygen belli olmağan şahıslar tarafından yaqalanğan ve alıp ketilgen qırımtatar faaliyetçisi Ervin İbragimovnıñ alıp qaçılğan yerinde qırımtatarlarnıñ ananeviy bayramı olğan Hıdırlezni keçire. Bunı Qırım.Aqiqat muhbiri bildire.
На месте похищения Эрвина Ибрагимова отметили Хыдырлез (видео)
Bayram şeñlikleri esnasında, adet üzre, milliy el sanatları ve yemekleri yarmalığı ve milliy küreş boyunca yarış ötkerildi. Rusiyege tabi Qırım ukümetiniñ başlığı Sergey Aksönov sanadan, bu yıl qocaman qadın fesi bayramnıñ simvolı olacaq, dep ilân etti. Keçken sene bu, qocaman çiberek edi.
Rusiyeniñ kontroli altında olğan mufti Emirali Ablayev, toplanğanlar ögünde çıqış yaparken Aksönovnı, dört yıl içinde «Qırım ve qırımtatarlarğa bütün yapqanları içün» minnetdarlığını bildirdi.
Devlet Dumasınıñ deputatı Ruslan Balbek bütün tedbir bitken soñ, bayram şeñliklerinde 55 biñ kişi iştirak etti, dep ilân etti. Deputat, esaplarını nege esaslandırğanını, añlatmadı.
Hıdırlez – türkiy halqlarınıñ eñ büyük bayramlarından biri. XIX asırda onıñ şeñlikleri üç kün devam ete edi.
2016 senesiniñ mayısında Bağçasarayda belli olmağan şahıslar Dünya Qırımtatar Kongressi icra komitetiniñ azası Ervin İbragimovnı alıp qaçtılar. Videoközetüv kamerası, Rusiye yol inspektorları uniformasını kiygen eki kişiniñ, İbragimovnıñ maşinasını toqtatıp, özüni öz mikroavtobuslarına zornen kirsetkenlerini qayd etti.
Qırım insan aqlarını qorçalav gruppası, bu alıp qaçuvnıñ Rusiye ukümeti ya da onıñ kontroli altında olğan paramilitar gruppalar tarafından kerçekleştirilgenini tahmin ete.
