Mayıs 4-te Rusiyege tabi olğan Aqmescitteki Merkeziy rayon mahkemesinde «fevral 26 işi» boyunca munaqaşalar yekünlendi. Mayıs 14 keçecek nevbetteki oturışuvda muhakeme etilgenler soñ sözleri ile çıqış yapacaqlar. Bunı Qırım.Aqiqa muhbiri bildire.
Munaqaşalarda Ali Asanovnıñ advokatı Edem Semedlâyev, Mustafa Degermenci ve onıñ advokatı Aleksandr Solodkov çıqışta bulundılar.
Daa evel devlet qabaatlayıcısı, işniñ üç diger figurantı ve olarnıñ advokatları çıqışta bulundı. Ali Asanov munaqaşalardaki çıqıştan vazgeçti.
Makemeniñ nevbetteki oturışuvı mayıs 14 saat 10:30-qa tayin etildi. Muhakeme etilgenlerniñ soñ sözleri ile çıqışta bulunacaqları planlaştırıldı
Bundan evel «fevral 26 işi» figurantı Mustafa Degermenci munaqaşalar esnasında bu iş boyunca qabaatlavğa, uydurılğan dep, prokurornıñ onıñ ve iş boyunca keçken Ali Asanov içün asla uyğun olmağan ceza istegenini bildirdi.
Öz nevbetine advokat Edem Semedlâyev, qabaatlav umumiy ibareler ile sıñırlanıp, er bir muhakeme etilgenniñ, qabaatları olaraq bildirilgen kütleviy qarışıqlıqtaki rolüni köstermey, dedi. Bunıñ kibi de Semedlâyev «qabaatlav şaatlarınıñ ifadelerinde bir çoq ciddiy zıddiyetniñ olğanını» ve, ondan ğayrı, olardan bir çoqunıñ Asanovnı mitingde asıl da körmegenini qayd etti. Advokatnıñ fikrince, buña köre, tahqiqat insanlarğa protokollarnı zorlap ve ya aldatıp imzalattı, ya da olar vaqianıñ yüz köstergen yerinde bulunmadılar.
2014 senesi fevral 26-da Qırım Yuqarı Radası binasınıñ divarları yanında Ukrainanıñ topraq bütünligine qol tutmaq maqsadınen yapılğan mitingde iştirak etkenleri içün bir gruppa qırımtatar faaliyetçilerine qarşı mahkeme 2015 senesinde başlandı.
Daa soñra mahkeme «Fevral 26 işi»ni ekige böldi: qırımtatar milliy areketiniñ liderlerinden biri Ahtem Çiygoznıñ işi, davanıñ diger figurantları olğan Ali Asanov, Mustafa Degermenci, Eskender Kantemirov, Talât Yunusov, Eskender Emirvaliyev, Arsen Yunusov ve Eskender Nebiyevniñ işinden ayırıldı.
2017 senesi oktâbr 25-te Rusiye ukümeti Qırımda mahküm etilgen Qırımtatar Milliy Meclisi reisiniñ muavinleri Ahtem Çiygoz ve İlmi Umerovnı azat etip, Türkiyege teslim etti. Daa soñra Umerov ve Çiygoz Kyivge keldiler.
