«Fevral 26 işi» figurantı Mustafa Degermenci, bu iş boyunca qabaatlavnı uydurılğan dep, prokurornıñ onıñ ve iş boyunca keçken Ali Asanov içün asla uyğun olmağan ceza istegenini bildirdi. Qırım.Aqiqat muhbiriniñ bildirgenine köre, bunı o, mayıs 4-te Rusiyeniñ kontroli altında olğan Aqmescitteki Merkeziy rayon mahkemesiniñ oturışuvı esnasında yapılğan munaqaşalarda bildirdi.
O, mahkemede 100-den ziyade şaattan iç birisi tarafından Ukrainağa qol tutmaq maqsadınen yapılğan mitingniñ teşkil etilgeni tasdiqlanmağanına diqqat çekti.
Degermenci: «Qabaatlavnıñ nege esaslanğanı, añlaşılmay. Polis hadimleriniñ bütün ifadeleri aynı bir nushadan köçürilgen kibi körüne: sözü-sözüne, aynı ibareler, virgüller bile aynı. Buña köre, işniñ uydurılğanını sölemege aqqım bar. Mında qırımtatarlardan ğayrı kimseni muhakeme etmeyler. Aceba, diger taraf bir şey yapmadımı? Men, mahkemeniñ şunı hatırlamasını isteyim: bu künlerde mende aqiqiy apis muddetiniñ üç yılı tola: eki yıl tahqiqat izolâtorında ve bir yıl ev apisinde. Ne içün buña kimse diqqat etmey?», – dep yekün çekti.
Daa evel mahkemeniñ oturışuvında advokat Edem Semedlâyev, qabaatlav umumiy ibareler ile sıñırlanıp, er bir muhakeme etilgenniñ, qabaatları olaraq bildirilgen kütleviy qarışıqlıqtaki rolüni köstermey, dedi. Bunıñ kibi de Semedlâyev «qabaatlav şaatlarınıñ ifadelerinde bir çoq ciddiy zıddiyetniñ olğanını» ve, ondan ğayrı, olardan bir çoqunıñ Asanovnı mitingde asıl da körmegenini qayd etti. Advokatnıñ fikrince, buña köre, tahqiqat insanlarğa protokollarnı zorlap ve ya aldatıp imzalattı, ya da olar vaqianıñ yüz köstergen yerinde bulunmadılar.
2014 senesi fevral 26-da Qırım Yuqarı Radası binasınıñ divarları yanında Ukrainanıñ topraq bütünligine qol tutmaq maqsadınen yapılğan mitingde iştirak etkenleri içün bir gruppa qırımtatar faaliyetçilerine qarşı mahkeme 2015 senesinde başlandı.
Daa soñra mahkeme «Fevral 26 işi»ni ekige böldi: qırımtatar milliy areketiniñ liderlerinden biri Ahtem Çiygoznıñ işi, davanıñ diger figurantları olğan Ali Asanov, Mustafa Degermenci, Eskender Kantemirov, Talât Yunusov, Eskender Emirvaliyev, Arsen Yunusov ve Eskender Nebiyevniñ işinden ayırıldı.
2017 senesi oktâbr 25-te Rusiye ukümeti Qırımda mahküm etilgen Qırımtatar Milliy Meclisi reisiniñ muavinleri Ahtem Çiygoz ve İlmi Umerovnı azat etip, Türkiyege teslim etti. Daa soñra Umerov ve Çiygoz Kyivge keldiler.
