Rusiyeniñ kontroli altında olğan Aqmescitniñ Merkeziy rayon mahkemesiniñ oturışuvında advokat Edem Semedlâyev, işniñ materiallarında onıñ imayesi altında olğan Ali Asanovnıñ 2014 senesi fevral 26-daki qarışıqlıqlar vaqtında Qırım Yuqarı Radası yanında olğanını ve qabaatı olaraq bildirilgen – yekâne zararlanğan Aleksey İvkin ile qavğada iştirak etkenini tasdiqlağan iç bir vesiqa olmağanını bildirdi.
Advokat: «Biñlerce kişi arasında tamam Ali Asanovnıñ olğanını tasdiqlay bilecek foto ve video malzemelerniñ iç bir ekspertizası yapılmadı. Zararlanğan İvkin mahkemede öyle de sorğulanmadı. Yüzleştirüv ve tanıma asıl da olmadı. Asanov, zarar körgenine sual bermek imkânından marum qaldırıldı», – dep añlattı.
Qırım.Aqiqat muhbiriniñ bildirgenine köre, advokat, qabaatlav umumiy ibareler ile sıñırlanıp, er bir muhakeme etilgenniñ, qabaatları olaraq bildirilgen kütleviy qarışıqlıqtaki rolüni köstermey, dep qayd etti. Bunıñ kibi de Semedlâyev «qabaatlav şaatlarınıñ ifadelerinde bir çoq ciddiy zıddiyetniñ olğanını» ve, ondan ğayrı, olardan bir çoqunıñ Asanovnı mitingde asıl da körmegenini qayd etti. Advokatnıñ fikrince, buña köre, ya tahqiqat insanlarğa protokollarnı zorlap ya da aldatıp imzalattı, ya da olar vaqianıñ yüz köstergen yerinde bulunmadılar.
Semedlâyev: «Muhakeme etilgenler skemlesinde yalıñız qırımtatarlarnıñ bulunması, bu işniñ siyasiy motivini köstere», – dep yekün çekti.
2014 senesi fevral 26-da Qırım Yuqarı Radası binasınıñ divarları yanında Ukrainanıñ topraq bütünligine qol tutmaq maqsadınen yapılğan mitingde iştirak etkenleri içün bir gruppa qırımtatar faaliyetçilerine qarşı mahkeme 2015 senesinde başlandı.
Daa soñra mahkeme «Fevral 26 işi»ni ekige böldi: qırımtatar milliy areketiniñ liderlerinden biri Ahtem Çiygoznıñ işi, davanıñ diger figurantları olğan Ali Asanov, Mustafa Degermenci, Eskender Kantemirov, Talât Yunusov, Eskender Emirvaliyev, Arsen Yunusov ve Eskender Nebiyevniñ işinden ayırıldı.
2017 senesi oktâbr 25-te Rusiye ukümeti Qırımda mahküm etilgen Qırımtatar Milliy Meclisi reisiniñ muavinleri Ahtem Çiygoz ve İlmi Umerovnı azat etip, Türkiyege teslim etti. Daa soñra Umerov ve Çiygoz Kyivge keldiler.
