Kremlniñ kontroli altında olğan Merkeziy rayon mahkemesiniñ oturışuvı esnasında «fevral 26 işi» figurantı Ali Asanov taraflarnıñ munaqaşalarında çıqış yapmaqtan vazgeçti. Bunı Qırım.Aqiqat muhbiri bildire.
Onıñ advokatı Edem Semedlâyev, imayesi altında olğan şahısnıñ, «prokurornıñ nutqunı köz ögüne alıp», çıqışqa daa tafslâtlı azırlanması içün oturışuvnı başqa vaqıtqa keçirilmesini istedi.
Mahkeme, mayıs 4-ke qadar teneffüsniñ ilân etilmesine dair qarar aldı.
Daa evel prokuror Dmitriy Tarannıñ «fevral 26 işi» figurantları Ali Asanov ve Mustafa Degermenci içün üç yıllıq sınama muddeti ile beş yılğa azatlıqtan şartlı olaraq marum etüv, Eskender Kantemirov, Arsen Yunusov ve Eskender Emirvaliyev içün üç yıllıq sınama muddeti ile 3,5 yılğa azatlıqtan şartlı olaraq marum etüv şeklinde cezalav istegeni bildirilgen edi.
2014 senesi fevral 26-da Qırım Yuqarı Radası binasınıñ divarları yanında Ukrainanıñ topraq bütünligine qol tutmaq maqsadınen yapılğan mitingde iştirak etkenleri içün bir gruppa qırımtatar faaliyetçilerine qarşı mahkeme 2015 senesinde başlandı.
Daa soñra mahkeme «Fevral 26 işi»ni ekige böldi: qırımtatar milliy areketiniñ liderlerinden biri Ahtem Çiygoznıñ işi, davanıñ diger figurantları olğan Ali Asanov, Mustafa Degermenci, Eskender Kantemirov, Talât Yunusov, Eskender Emirvaliyev, Arsen Yunusov ve Eskender Nebiyevniñ işinden ayırıldı.
2017 senesi oktâbr 25-te Rusiye ukümeti Qırımda mahküm etilgen Qırımtatar Milliy Meclisi reisiniñ muavinleri Ahtem Çiygoz ve İlmi Umerovnı azat etip, Türkiyege teslim etti. Daa soñra Umerov ve Çiygoz Kyivge keldiler.
