Link açıqlığı

Saatnıñ esas haberi

«Hizb ut-Tahrir işi» figurantı Abdullayevni acele surette hastahanege yatqızmaq kerek – apayı


«Hizb ut-Tahrir işi» figurantlarından biri Uzeir Abdullayevniñ, doğru diagnozınıñ qoyulması içün acele surette hastahanege yatqızılmasına ihtiyacı bar. Bunı Qırım.Aqiqat Radiosı efirinde mabüsniñ apayı Fera Abdullayeva bildirdi.

«Uzeirniñ mayıs 2 künündeki sağlıq vaziyeti aqqında bilmeymiz, çünki oña irişip, onıñnen bağlanıp olamaymız. Aprel 30-da Cemiyet közetüv komissiyasınıñ vekilleri, onıñ sıcağı ve ayaqtaki şişik ile tibbiy bölükke keçirilgenini bildirdiler. Bizim malümat talaplarımızğa cevap bermeyler. Bunıñ bir künlük hastalıq olmağanını ve onıñ endi üç-dört ay devam etkenini iç şübhesiz ayta bilem. Bizim malümatımızğa köre, bu endi üçünci keskinleşmesi… Aqibet diagnozınıñ qoyulması içün onı acele surette hastahanege yatqızmaq kerek», – dep qayd etti o.

Ondan ğayrı, Azatlıq Radiosı muhbiri Anton Naumlük, şimdi Abdullayev bulunğan Aqmescit tahqiqat izolâtorındaki tibbiy bölükniñ vaziyeti aqqında ikâye etti.

«Anda tibbiy bölük deşetli vaziyette buluna. Uzeir Abdullayev keçirilgen tibbiy kabinet, hastahane degil de, en az kolemde tibbiy hizmetler kösterilgen adiy bir kameradır. Bilgenim qadarı ile, Aqmescit tahqiqat izolâtorında mabüsler onı öz paralarına teşkil etti. İlâclar aman-aman er vaqıt yetmey», – dedi o.

Aprel 30-da «Qırım birdemligi» cemiyet birleşmesiniñ oturışuvında Uzeir Abdullayevniñ apayı Fera Abdullayeva, onıñ aprel 30-da Aqmescitteki tahqiqat izolâtorınıñ tibbiy bölügine keçirilgenini bildirdi .

Daa evel Abdullayevniñ anası, tahqiqat izolâtorında bulunğan oğlunda bir qaç künden berli yüksek sıcağı, ayağında şişik ve şişiklik bar, o, dayanılmaz ağrılar çeke, dep bildirdi. Dilâra Abdullayevanıñ bildirgenine köre, bu alâmetler qannıñ zeerlenmesini köstermek mümkünler.

Rusiye advokatı Nikolay Polozov, Rusiye prezidenti yanındaki İnsan aqları boyunca şura (İAŞ) ve Rusiye ombudsmeni Tatyana Moskalkovadan Abdullayev etrafındaki vaziyetke qarşılıq köstermekni rica etti.

Kremlniñ kontroli altında olğan Qırım Yuqarı mahkemesi Aqmescitteki «Hizb ut-Tahrir işi» figurantları Teymur Abdullayev, Uzeir Abdullayev, Ayder Saledinov, Rustem İsmailov ve Emil Cemadenovnıñ qorçalayıcıları tarafından sıñırlav tedbiriniñ uzatılmasına qarşı berilgen apellâtsiyalarnı red etti.

2016 senesi oktâbrniñ 12-sinde Qırımda beş musulman qorantasınıñ evleri tintildi. Tintüvler neticesinde Rusiyede yasaq etilgen «Hizb ut-Tahrir» teşkilâtında iştirak etkenlerinde qabaatlanğan beş qırımtatar: Rustem İsmailov, Uzair Abdullayev, Teymur Abdullayev, Emil Cemadenov ve Ayder Saledinov tevqif etildi.

«Hizb ut-Tahrir» halqara siyasiy İslâm teşkilâtınıñ vekilleri öz vazifesini, bütün musulman devletleriniñ bir İslam hilâfeti içinde birleştirilmesinde köreler. Lâkin olar buña irişmek içün terroristik usullarnıñ qullanılmasını red ete ve Rusiyede aqsız yerde taqip etilgenlerini aytalar. Rusiyeniñ Yuqarı mahkemesi 2003 senesinde «Hizb ut-Tahrir»ni yasaq etip, «terroristik» tanılğan 15 birleşmeniñ cedveline kirsetti.

«Hizb ut-Tahrir işi» boyunca tevqif ve mahküm etilgen Qırım sakinleriniñ qorçalayıcıları, taqipniñ diniy alâmetke köre yapılğanını tüşüne. Advokatlar, Rusiye uquqqoruyıcı organları tarafından bu iş boyunca taqip etilgenler esasen qırımtatarlar ve olarnen birlikte İslâm dinini kütken ukrainler, ruslar, tacikler, azerbaycanlar ve diger etnik gruppalarğa ait Qırım sakinleri olğanını qayd eteler. Halqara uquq, işğal etilgen territoriyada işğal etken devletniñ qanunlarını tatbiq etmekni yasaq ete.

XS
SM
MD
LG