Link açıqlığı

Saatnıñ esas haberi

Uzeir Abdullayevniñ sağlıq vaziyeti eyileşti – advokat Polozov


Nikolay Polozov
Nikolay Polozov

Aqmescitteki «Hizb ut-Tahrir işi» figurantı Uzeir Abdullayevniñ sağlıq vaziyeti biraz eyileşti, sıcağı tüşti. Bunı aprel 30-da Rusiye advokatı Nikolay Polozov Facebooktaki saifesinde yazdı.

Polozov: «Men, bugün Uzeir Abdullayevni Aqmescit tahqiqat izolâtorında ziyaret etken CKK (Cemiyet közetüv komissiyası – QA) azalarınen qısqadan laf ettim. Onıñ sağlıq vaziyeti eyileşti. Sıcağı tüşti. O, daa uyğun şaraitlerge keçirildi (tibbiy bölükke keçirilgeni aqqında malümatnı tasdiqlap olamadım, bu sebepten yalıñız tam olaraq bilgenlerimni aytam). Abdullayevni CKK azaları ile birlikte FSİNniñ (Cezalarnı içra etüv federal hizmetiniñ) Qırım boyunca rehberi, general Bulgakov ve tahqiqat izolâtorınıñ rehberi, podpolkovnik Berejnoy ziyaret ettiler», – dep yazdı.

Advokatnıñ bildirgenine köre, Uzeir, videoregistratorğa çıqarılğan alda, alını bildirdi ve, tahqiqat izolâtorındaki tibbiy hizmetlerniñ keyfiyeti ile tutuluv şaraitlerini maqul sayğanı aqqında ariza yazdı.

Advokat: «O birisi kün (aprel 28 künü – QA) ondan taliller alındı, tezden netice belli olacaq ve buña köre tedaviylevi doğrulanacaq. CKK azaları, Uzeir Abdullayevni ziyaret etüv aqqında esabat Qırım CKKsiniñ resmiy saytında derc etilecek, dep bildirdiler.

Bundan evel aprel 30-da «Qırım birdemligi» cemiyet birleşmesiniñ oturışuvında Uzeir Abdullayevniñ apayı Fera Abdullayeva, onıñ aprel 30-da Aqmescitteki tahqiqat izolâtorınıñ tibbiy bölügine keçirilgenini bildirdi .

Daa evel Abdullayevniñ anası, tahqiqat izolâtorında bulunğan oğlunda bir qaç künden berli yüksek sıcağı, ayağında şişik ve şişiklik bar, o, dayanılmaz ağrılar çeke, dep bildirdi. Dilâra Abdullayevanıñ bildirgenine köre, bu alâmetler qannıñ zeerlenmesini köstermek mümkünler.

Rusiye advokatı Nikolay Polozov, Rusiye prezidenti yanındaki İnsan aqları boyunca şura (İAŞ) ve Rusiye ombudsmeni Tatyana Moskalkovadan Abdullayev etrafındaki vaziyetke qarşılıq köstermekni rica etti.

Kremlniñ kontroli altında olğan Qırım Yuqarı mahkemesi Aqmescitteki «Hizb ut-Tahrir işi» figurantları Teymur Abdullayev, Uzeir Abdullayev, Ayder Saledinov, Rustem İsmailov ve Emil Cemadenovnıñ qorçalayıcıları tarafından sıñırlav tedbiriniñ uzatılmasına qarşı berilgen apellâtsiyalarnı red etti.

2016 senesi oktâbrniñ 12-sinde Qırımda beş musulman qorantasınıñ evleri tintildi. Tintüvler neticesinde Rusiyede yasaq etilgen «Hizb ut-Tahrir» teşkilâtında iştirak etkenlerinde qabaatlanğan beş qırımtatar: Rustem İsmailov, Uzair Abdullayev, Teymur Abdullayev, Emil Cemadenov ve Ayder Saledinov tevqif etildi.

«Hizb ut-Tahrir» halqara siyasiy İslâm teşkilâtınıñ vekilleri öz vazifesini, bütün musulman devletleriniñ bir İslam hilâfeti içinde birleştirilmesinde köreler. Lâkin olar buña irişmek içün terroristik usullarnıñ qullanılmasını red ete ve Rusiyede aqsız yerde taqip etilgenlerini aytalar. Rusiyeniñ Yuqarı mahkemesi 2003 senesinde «Hizb ut-Tahrir»ni yasaq etip, «terroristik» tanılğan 15 birleşmeniñ cedveline kirsetti.

«Hizb ut-Tahrir işi» boyunca tevqif ve mahküm etilgen Qırım sakinleriniñ qorçalayıcıları, taqipniñ diniy alâmetke köre yapılğanını tüşüne. Advokatlar, Rusiye uquqqoruyıcı organları tarafından bu iş boyunca taqip etilgenler esasen qırımtatarlar ve olarnen birlikte İslâm dinini kütken ukrainler, ruslar, tacikler, azerbaycanlar ve diger etnik gruppalarğa ait Qırım sakinleri olğanını qayd eteler. Halqara uquq, işğal etilgen territoriyada işğal etken devletniñ qanunlarını tatbiq etmekni yasaq ete.

XS
SM
MD
LG