Ukraina prezidenti Petro Poroşenko tarafından «Vatandaşlıq aqqında» qanunğa teklif etilgen deñişmelerniñ maqsadı, Qırım sakinlerini vatandaşlıqtan marum etmek degil de, qanunsız olaraq Ukraina vatandaşlığınıñ alınması boyunca tafsilâtlardır. Bu fikirni Qırım.Aqiqat Radiosınıñ efirinde Ukrainadaki «Regional insan aqları merkezi»niñ adliyecisi Vitaliy Nabuhotnıy ifade etti.
Onıñ aytqanına köre, qanun leyhasında, Qırımda alınğan Rusiye vatandaşlığı göñülli olaraq alınğan dep sayılmay, ve avtomatik şekilde zornen qabul ettirilgenini tayin etken maddelerge uyğundır. Bu sebepten Ukraina bu vesiqalarnı tanımay.
Vitaliy Nabuhotnıy: «Men vaqıttan evel «hainlik» dep qıyamet qoparmaz edim… Menim fikrime köre, Qırımdaki Rusiye pasportları ile berilgen şey «çetel memleketiniñ vatandaşlığı» sayılmaz, çünki Ukraina olarnı tanımay. Ukraina Moskvada berilgen pasportnı tanıy, lâkin insannıñ Qırımda alğan pasportını tanımay. Ondan ğayrı, bu qanun leyhası içün berilgen izalav tezkeresi baqılsa, anda Qırım ve vatandaşlıqnıñ ğayıp etilmesi aqqında iç bir şey aytılmayıp, Ukraina vatandaşlığınıñ alınması içün şartlarnıñ yaratılması aqqında aytıla», – dedi.
Ukrainadaki «Regional insan aqları merkezi»niñ adliyecisi Vitaliy Nabuhotnıyden alınğan intervyüni Qırım.Aqiqat saytında yaqın künlerde oquñız.
Ukraina Yuqarı Radasına 2018 senesin aprel 19-da qayd etilgen Petro Poroşenkonıñ 8297 nomeralı qanun leyhası Ukraina vatandaşlığınıñ ğayıp etilmesi içün, cümleden, devlet organlarınıñ halq içün açıq olğan reyestrleri ile tasdiqlana bilecek çet memleketiniñ vatandaşlığı bergen saylav aqqını ya da diger aqnı qullanuv ve ya çet memleketiniñ vatandaşlığı yüklengen mecburiyetlerni yerine ketirüv; ya da (Ukraina Devlet sıñır hizmetiniñ vazifeli şahsı tarafından qayd etilmesi taqdirde) Ukrainadan çıqmaq ve ya Ukrainağa kirmek içün çet memleketiniñ pasportını qullanuv kibi qoşma şartlarnı teklif ete.
Aynı zamanda qanun leyhasında, Qırımdaki Rusiye ukümetiniñ qanunsız areketleri neticesinde Rusiye vatandaşı olğan Qırım sakinlerini, böyle pasportlarnı göñülli olaraq alğanlar dep saymaq mümkün degil, denile. Demek ki, bu, olarnı Ukraina vatandaşlığından marum etmek içün esas olamaz. Prezidentniñ qanun leyhası Ukraina Yuqarı Radasına aprel 19-da berildi ve şimdilik komitetlerde ögrenile.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalarnı qullandı. Rusiye, yarımadanı işğal etkenini red etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevral 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
