Ukraina prezidenti Petro Poroşenko Yuqarı Radağa, «Qırımda işğalci ukümetiniñ qanunsız areketleri neticesinde» ilhaq etilgen Qırım sakinleri tarafından Rusiye pasportlarınıñ alınması, Ukraina vatandaşlığını ğayıp etmeleri içün esas olmağanını közde tutqan qanun leyhasını qabul etmege teklif ete.
Bu aqta aprel 19-da qayd etilgen 8297 nomeralı qanun leyhasında aytıla.
Aynı zamanda leyha, şu cümleden devlet organlarınıñ halq içün açıq olğan reyestrleri ile tasdiqlana bilecek çetel devleti tarafından berilgen saylav aqqını ya da diger aqnı qullanuv ve ya çetel devleti tarafından yüklengen mecburiyetlerni yerine ketirüv; ya da (Ukraina Devlet sıñır hizmetiniñ vazifeli şahsı tarafından qayd etilmesi taqdirde) Ukrainadan çıqmaq ve ya Ukrainağa kirmek içün çetel devleti pasportını qullanuv kibi Ukraina vatandaşlığını ğayıp etmek içün qoşma esaslarnı teklif ete.
Ukraina prezidentiniñ QMCde daimiy temsilcisi Boris Babin Facebookta, «Ukraina vatandaşlığı aqqında» Ukraina qanunınıñ 19-ncı maddesi içün teklif etilgen deñişmeler, Ukraina vatandaşlığınıñ avtomatk şekilde ğayıp etilmesi içün esas olmayıp, aksine, «Qırım Muhtar Cumhuriyeti ve Aqyar şeeriniñ vaqtınca işğal etilgen territoriyasında Rusiyeniñ işğalci memuriyeti tarafından uquqqa qarşı ve vicdansız areketlerniñ yapılması» taqdirde Ukraina vatandaşlığınıñ avtomatik şekilde ğayıp etilmesine yol bermey, dep añlattı.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalar qullandı. Rusiye, yarımadanı işğal etkenini red etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevral 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
