«Veciye Kaşka işi» figurantları Asan Çapuh ve Bekir Degermenci Aqmescit tahqiqat izolâtorınıñ tibbiy bölüginde bulunalar. Bunı Facebookta advokat Ayder Azamatov bildirdi.
Azamatov: «Tünevin (aprel 24-te – QA) tahqiqat izolâtorında Çapuh Asan ağanı ziyaret ettim… Sağlığı bir qarar, insultten soñ ayağınıñ sol tarafı ale daa uyuşqan alda olğanına şikâyet ete. Onı is etmey… O, maña, aqrabaları ve yaqın insanları ketirgen ilâclar sayesinde alı bir qarar olğanını dedi. Onda yüksek basım olıp, toqtamayıp sekirkley. Onı baş ağrıları raatsızlay. İnsanğa iç de kelişmegen tutuluv şaraitleri bar, er yerde dım ve yüksek dımlılıq, bu ise astması olğan insanlar, yani Bekir ağa içün pek havflı», – dep qayd etti.
Advokatnıñ aytqanına köre, Çapuh ve Degermenciniñ tevqifi mayıs 15-ke qadar devam etecek.
2017 senesi noyabrniñ 23-nde Aqmescitte Rusiye telükesizlik hadimleri bir grup qırımtatarlar – Kâzim Ametov, Asan Çapuh, Ruslan Trubaç ve Bekir Degermencini yaqaladılar. Olar Türkiye vatandaşından «aqsız yerde hususan büyük miqdarda para talap etüv»de qabaatlanalar. Rusiye telükesizlik hadimleri tarafından yaqalanuvları esnasında qırımtatar milliy areketiniñ veteranı Veciye Kaşka yaramadı. Daa soñra qadınnıñ vefat etkeni belli oldı.
Bekir Degermencide sürekli astma bar. Tahqiqat izolâtorında sağlığı birden fenalaştı. Qırım Yuqarı mahkemesiniñ zalında faaliyetçige «acele yardım» çağırılğan edi.
Dekabrniñ 14-ne keçer gecesinde o, reanimatsiyağa oğradı. Ondan soñ onı pulmonologiya bölüginiñ koridorında tuttılar. 2018 senesi yanvarniñ 2-nde faaliyetçini tekrar tahqiqat izolâtorına yolladılar.
Qırımtatar faaliyetçisi Asan Çapuh tahqiqat izolâtorında mikroinsult keçirdi ve acele surette hastahanege yatqızılmasına muhtac edi. Yılbaş tatilleriniñ arfesinde o, tıbbiy teşkerüvden keçirildi, lâkin onıñ advokatı, diagnozı ve sağlığınıñ vaziyeti aqqında ale daa bir şey bilmey.
İlhaqtan soñ Qırımda Rusiyeniñ amelde akimiyeti mustaqil jurnalistler, vatandaş faaliyetçileri, Qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.
