Rusiye saylavında mecburen rey bergen ya da Rusiye ordusında hizmet etmege mecbur etken Qırım sakinlerini Ukraina pasportlarından marum etmemek içün prezidentniñ «Ukraina vatandaşlığı aqqında» qanunına tüzetmeler leyhasını daa işlemek kerek. Bu fikirni Qırımtatar resurs merkezi idaresiniñ başlığı, Qırımtatar Milliy Meclisiniñ azası Eskender Bariyev ifade etti.
«Elbette, Qırımda işğalci ukümet tarafından teşkil etilgen saylavlar ya da başqa areketlerde iştirak etken insanlarnıñ vatandaşlıqtan marum etilmesini közde tutqan uküm, em ekspertler, em de toplulıqnıñ daa çoq diqqatını çekti. Lâkin biz saylavlar, orduda hizmet ya da başqa bir şeyler aqqında yalıñız aytamız, bir çoq Qırım sakini ise bu işlerde iştirak etmege mecbur. Misal içün, hususan celpnameler aqqında soñki tüzetmelerden soñ, Rusiye ordusında hizmet etmekten qaçaqlav içün gençlerni mahküm etmek mumkünler… Er ne ise de, qanun leyhasınıñ metnini daa da işlemek kerek, çünki onı türlü-türlü izalaylar», – dep qayd etti Bariyev.
Ukraina prezidenti Petro Poroşenko «Ukraina vatandaşlığı aqqında» qanunğa tüzetmeler kirsetüv ceryanını başlattı. Bu, KHVler ve içtimaiy ağlarda qızğın muzakereler içün sebep oldı. Misal içün, qanun leyhasında, eki vatandaşlığı olğan insanlar, ülkege Rusiye pasportını qullanıp kirecek olsalar, Ukraina vatandaşlığını ğayıp ete bilecekler, denile. Rusiye saylavlarında iştirak etken ve bu sebepten Rusiye ukümet organlarınıñ resmiy cedveline kirsetilgen Qırım sakinleri de aynı şekilde cezalanmaq mumkünler.
Aynı zamanda qanun leyhasında, Qırımdaki Rusiye ukümetiniñ qanunsız areketleri neticesinde Rusiye vatandaşı olğan Qırım sakinlerini, böyle pasportlarnı göñülli olaraq alğan saymaq mümkün degil, denile. Demek ki, bu, olarnı Ukraina vatandaşlığından marum etmek içün esas olmaq mumkün degil. Prezidentniñ qanun leyhası Ukraina Yuqarı Radasına aprel 19-da berildi ve şimdilik komitetlerde ögrenile.
Qırımtatar Milliy Meclisiniñ reisi, Ukraina halq deputatı Refat Çubarov, prezidentniñ Vatandaşlıq aqqında qanun leyhasındaki normalar, komitetlerde ya da Radanıñ sessiyasında baqılğanda deñiştirile bilecekler, dep tahmin etti.
Halqara teşkilâtlar Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalarnı tatbiq etti. Rusiye, yarımadanı işğal etkenini red etip, buña «tarihiy adaletniñ tiklenüvi», dey. Ukrainanıñ Yuqarı Radası 2014 senesi fevral 20 kününi, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
