Aprel 23-te işini başlaycaq Avropa Şurası Parlament assambleyasınıñ (AŞPA) baar sessiyasında ilhaq etilgen Qırımdaki insan aqlarınıñ bozuluvları ve Rusiye saylavlarını muzakere etecekler.
Ondan ğayrı, AŞPAda Avropada antisemitizm, islamofobiya ve ksenofobiyanıñ artuv ve İnsan aqlarını qorçalama konventsiyasınıñ mehnizmini deñiştirüv mevzularında munaqaşalar keçecek.
Munasip kün tertibi AŞPAnıñ saytında derc etildi.
Mart 19-da Ukraina prezidenti Petro Poroşenko, Rusiye tarafından ilhaq etilgen Qırımda keçirilgen saylavnıñ neticelerine «sıfır derecesinde» ve «uquqiy neticeleri olmaycaq», dedi.
Ukraina Yuqarı Radası mart 22-de ilhaq etilgen Qırım territoriyasında Rusiye prezidenti saylavınıñ tanılmaması aqqında qarar içün rey berdi.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalarnı qullandı. Rusiye, yarımadanı işğal etkenini red etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevral 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
