Martnıñ 22-nde Ukraina Yuqarı Radası ilhaq etilgen Qırımda keçken Rusiye prezidenti saylâvalarını tanılmamasına dair qararğa rey berdi.
Asğariy 226 ses olmaq kerek ekende bu qarar içün 255 halq deputatı rey berdi. 22 halq deputatı rey berüvde iştirak etmedi.
Daa evel halq deputatları Maksim Burbak ve Georgiy Logvinskiy parlamette Qırımnı ilhaq etkeni sebebinden Rusiye prezidenti saylâvlarınıñ tanılmamasınen bağlı qarar leyhasını qayd ettirgen ediler.
Martnıñ 18-nde Rusiyede ve ilhaq etilgen Qırımda prezident saylâvları ötkerildi. Resmiy Kyiv ve bir sıra halqara teşkilâtlarnen beraber dünyanıñ bir çoq devleti yarımadada keçken saylâvlarnı tanımay.
Martnıñ 19-nda Ukraina prezidenti Petro Poroşenko Rusiyeniñ ilhaq etilgen Qırımda keçirgen saylâvalarını «pek az» ve «qanuniy neticesi» yoq dep adlandırdı.
Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada ilhaqını inkâr etip, buña «tarihiy adaletniñ tiklenmesi» dey. Ukraina Yuqarı Radası 2014 senesi fevral ayınıñ 20-sini Rusiye tarafından Qırımnıñ muvaqqat işğaliniñ resmiy başlanğıç künü dep qabul etti.
