Link açıqlığı

Saatnıñ esas haberi

Aqmescitteki Kyiv rayon mahkemesi aprel 21-de «narazılıq alanlar»nıñ qırımtatar faaliyetçisi Fazil İbraimovnıñ tevqifini eki ayğa uzattı. O, tahqiqat izolâtorında iyün 22-ge qadar qalacaq, dep bildire Qırım.Aqiqat muhbiri.

Advokat Edem Semedlâyev: «Oturışuv eki saatke keçke qalıp başlandı, çünki tahqiqat qırımtatar tiline tercimannı tapalmay edi. Fazil İbraimovğa sıñırlav tedbiriniñ deñiştirilmesine dair muracaatımız, evelden tüşüngenimiz kibi, red etildi», – dep ikâye etti.

Aprel 20-de, cuma künü, Qırım Yuqarı mahkemesi advokatlar Edem Semedlâyev ve İslâm Veliyev tarafından, Fazil İbraimovğa tevqif muddetiniñ uzatılmasına qarşı berilgen apellâtsion şikâyetni qanaatlendirmedi.

Rusiye İİNiniñ Qırım boyunca idaresiniñ hadimleri fevral 15-te Aqmescitte Strelkovaya soqağı rayonında «topraq arsasınıñ zapt etilmesini teşkil etkenlerinden biri»niñ evini tinttiler.

Polis hadimleri «narazılıq alanı» faaliyetçisi Fazil İbraimovnı yaqalap, Rusiye İİNiniñ Qırım boyunca idaresiniñ şeer bölügine alıp kettiler.

Qırım QHVleri, İbraimov «Rusiye Cinaiy-protsessual kodeksiniñ 91-nci maddesine muvafıq olaraq cinayet şübhesi ile» resmen yaqalandı, dep bildirdiler.

Fazil İbraimov, «narazılıq alanları» – qırımtatarlarnıñ sürgünlikten qaytqan soñ zapt etken topraqlarınıñ qanuniyleştirilmesi oğrunda küreşi ile belli.

Qırımtatarlar evler qurğan «Strelkovaya» «narazılıq alanı» yerinde «Krımskaya roza» adlı yañı 9 biñ kişilik rayonnı qurmağa azırlanalar. Mesken evlerden ğayrı mektepler, balalar bağçaları, sport kompleksleri ve tükânlarnı qurmaqnı planlaştıralar. Şimdi adna ekseriyetle sürgünlikten qaytqanlar yaşay.

XS
SM
MD
LG