Link açıqlığı

Saatnıñ esas haberi

Qırım MVDsi: Aqmescitte dolandırıcılıqta şeklengen «narazılıq meydanı» faaliniñ evinde tintüv yapıldı


Rusiye MVDsiniñ Qırım idaresi haber etkenine köre, fevralniñ 15-nde, Aqmescitniñ Strelkovaya soqağı etraflarında «topraq damartısını işğal etip alğan bir teşkilâtçınıñ» evinde tintüv yapılğan.

Müessiseniñ matbuat hızmeti bildirgenine köre, tintüv «dolandırıcılıq areketleri yapıluvınen bağlı açılğan bir cinaiy iş» çerçivesinde yapılğan eken.

«Al-azırda söz yürsetilgen şahısnıñ Rusiye Federatsiyası Cinaiy protsesual kodeksiniñ 91 maddesine binaen tutulıp alınmasınen (cinayet işlegninde şeklenüv boyunca) alâqalı qarar berilmesi muzakere etilmekte», – denilmekte haberde.

Qırım MVDsi şeklengen faalniıñ adını bermey.

Yarımada ükümetine yaqın sayılğan «Krıminform» saytınıñ malümatına köre, rusiyeli küç idaresiniñ hadimleri tintüvni «Strelkovaya» «narazılıq meydanınıñ» faali Fazıl İbraimovnıñ Aqmeçet qasabasındari evinde ötkergen ekenler.

Fevralniñ 15-nde Rusiyeli «Novaya gazeta» gazetası haber etkenine köre, Rusiye MVDsiniñ hadimleri Aqmescitte «Strelkovaya» «narazılıq meydanınıñ»faali Fazıl İbraimovnı tutıp alğanı aqqında haber etken edi.

Fazıl İbraimov, sürgünden soñ avdet etken qırımtatarlar işğal etip alğan topraqlar yani «narazılıq meydanlarınıñ» resmiyleştirilmesi içün alıp barğan kürüşinen meşurdır.

Fevralniñ 4-nde Aqmescitte Aqmecsit rayonı Strelkovaya «narazılıq meydanınıñ» faalleri miting keçirerek, Rusiye prezidenti Vladimir Putinden evlernen caminiñ yıquvdan qorçalmasına» çağıraraq, açlıq ilân etken ediler.

2017 senesi avgust ayında rusiyeli ükümet «Krımskaya roza»nen alâqalı ictimaiy diñlevler keçire. Fazıl İbraimov o künü çıqış yapamay, çünki onı zaldan çıqarıp yibereler. Fazıl İbraimov «politsiyanıñ qanuniy talabına riyayet etmemekte» qabaatlanıp, beş künge tevqif etile. Diñlevler mufafaqiyetli keçti dep tanıla.

İctimaiy diñlevlerde çıqış yapmaq istegeni içün rusiyeli küç idaresiniñ hadimleri 62-yaşındaki İbraimovnıñ evine tintüv yapmağa kele. Onıñ evinde islâmnen alâqalın kitap ve «narazılıq meydanınıñ» iştirakçilerinen bağlı vesiqalar qıdıralar.

«Strelkovaya» «narazılıq meydanı» yerine «Krımskaya roza» adlı 9 biñ kişilik yañı rayon qurulması planlaştırıla. Mesken evlerden ğayrı mında mektep, balalar bağçası, sport kompleksleri ve tükânlar qurulması planlaştırıla. Şimdi bu yerde esasen sürgünden qaytqan insanlar yaşay.

XS
SM
MD
LG