Kremlniñ kontroli altında olğan Qırım Yuqarı mahkemesi advokatlar Edem Semedlâyev ve İslâm Veliyevniñ, «narazılıq alanı»nıñ faaliyetçisi Fazil İbraimovnıñ tevqifini uzatuvğa qarşı berilgen apellâtsion şikâyetlerini qanaatlendirmedi. Bunı aprel 20-de Qırım.Aqiqat muhbiri bildire.
İbraimovnıñ tahqiqat izolâtorında tutuluv muddeti aprel 23-te soñuna yete. Bu munasebet ile advokatlar, yaqın künlerde tevqifniñ uzatılması boyunca nevbetteki oturışuvnıñ olacağını bekleyler. Oturışuv esnasında advokatlar, faaliyetçiniñ mahkeme zalına ketirilmesine dair muracaat ettiler. Lâkin mahkeme bunı red etti – İbraimov oturışuvda videoalâqa vastasınen iştirak etti. Oturışuv ise qapalı rejimde keçti.
Advokat: «Bir an oldı ki, imayem altında bulunğan şahıs, özüni siyasiy sebepten tevqif etilgen dep sayğanı içün, oturışuvda iştirak etmekten ve akemniñ suallerine cevap bermekten vazgeçti», – dep ikâye etti.
Rusiye İİNiniñ Qırım boyunca idaresiniñ hadimleri fevral 15-te Aqmescitte Strelkovaya soqağı rayonında «topraq arsasınıñ zapt etilmesini teşkil etkenlerinden biri»niñ evini tinttiler.
Polis hadimleri «narazılıq alanı» faaliyetçisi Fazil İbraimovnı yaqalap, Rusiye İİNiniñ Qırım boyunca idaresiniñ şeer bölügine alıp kettiler.
Qırım QHVleri, İbraimov «Rusiye Cinaiy-protsessual kodeksiniñ 91-nci maddesine muvafıq olaraq cinayet şübhesi ile» resmen yaqalandı, dep bildirdiler.
Fazil İbraimov, «narazılıq alanları» – qırımtatarlarnıñ sürgünlikten qaytqan soñ zapt etken topraqlarınıñ qanuniyleştirilmesi oğrunda küreşi ile belli.
Qırımtatarlar evler qurğan «Strelkovaya» «narazılıq alanı» yerinde «Krımskaya roza» adlı yañı 9 biñ kişilik rayonnı qurmağa azırlanalar. Mesken evlerden ğayrı mektepler, balalar bağçaları, sport kompleksleri ve tükânlarnı qurmaqnı planlaştıralar. Şimdi adna ekseriyetle sürgünlikten qaytqanlar yaşay.
