Qırım advokatı Emil Kurbedinov, «Qırım diversantlarınıñ işi» boyunca mahküm etilip, apishaneden azat etilgen soñ 3 milliondan ziyade ruble (qararnen 1,5 million hrivna) miqdarında cöreme tölemege mecbur etilgen Redvan Suleymanovnıñ uquqiy qorçalavını devam etmek niyetinde.
Kurbedinov: «Mahkeme, azatlıqtan marum etüvden ğayrı, ava limanı, avtovokzal ve Keriç parom keçitinde sanki yer alğan çoq millionlıq zararlarnı Redvan (Suleymanov – QA) üstüne astı! Bizim şikâyet bermemiz daa soñuna yetmedi ve men onıñ işi boyunca uquqiy çalışmalarnı devam etecem», – dedi.
Advokatnıñ aytqanına köre, al-azırda Qırımda bulunğan Suleymanovğa, Rusiye mahkemesi tarafından tayin etilgen cöreme sebebinden Ukrainanıñ qıtadaki qısmına çıqmağa izin bermeycekler.
Kremlniñ kontroli altında olğan Aqmescitteki Jeleznodorojnıy rayon mahkemesi 2017 senesi ağustos 10-da 28 yaşlı Redvan Suleymanovnı, bir gruppa şahıslar tarafından evelden añlaşılıp yapılğan terrorizm aktı aqqında yalan malümat bildirgeninde (Rusiye Cinaiy kodeksiniñ 207-nci maddesiniñ 2-nci qısmı) qabaatlı tanıdı. Oña qarşı 1 yıl ve 8 ay müddetli koloniya cezası tayin etildi, ve onı 3,5 milliondan ziyade ruble (qararnen 1,5 mln hrivna – QA) miqdarındaki «zarar»nı tölemege mecbur ettiler.
2018 senesiniñ martında Suleymanov apishaneden azat etildi.
Redvan Suleymanov 2016 senesi iyül 30-da Aqmescit ava limanı territoriyasında yaqalandı. Ağustos 12-de Rusiye FSBsi Rusiyeniñ kütleviy haber vastalarında Suleymanovnıñ sorğusı ve itirafları ile videonı cayrattı. Yaqalanğan, 2015 senesiniñ oktâbrinde Zaporojyede Ukraina istihbaratı tarafından verbovka etilgenini iddia ete. Suleymanovnıñ aytqanına köre, onıñ maqsatlarına arbiy tehnikanıñ areketleri aqqında malümatnıñ toplaması kire edi, ve daa soñra oña, sanki, Aqmescit demiryol vokzalı ve ava limanında patlatıcı tertibatlarnıñ qoyulması içün yer tapmaq vazifesi berilgen edi.
Ukraina Arbiy quvetleriniñ Baş ştabında Rusiye Federal hizmetiniñ bildirüvini inkâr eteler.
