«Qırım diversantları işi» figurantı Redvan Suleymanov azat etildi. Qırım.Aqiqat muhbiriniñ bildirgenine köre, Suleymanov Rusiyede Kirov vilâyetindeki umumiy rejimli koloniyada cezasını çekip, eñ yaqın vaqıtta Qırımğa qaytmaq niyet ete.
Kremlniñ kontroli altında olğan Aqmescitteki Jeleznodorojnıy rayon mahkemesi 2017 senesi ağustos 10-da 28 yaşlı Redvan Suleymanovnı, bir gruppa şahıslar tarafından, evelden añlaşıp yapılğan terrrorizm aktı (Rusiye Cinaiy kodeksi, 207-nci madde, 2-nci qısım) aqqında yalancı bir bildirüv boyunca qabaatlı tanıdı. O, umumiy rejimli koloniyada 1 yıl ve 8 ayğa mahküm etildi ve 3,5 mln rubleden (qararnen 1,5 mln hrivnadan – QA) ziyade «zarar»nı ödemege mecbur etildi.
Ukraina TİNinde Redvan Suleymanovğa qarşı çıqarılğan ukümni taqbih etti ve Rusiye ukümetini yarımadada qırımtatarlarğa qarşı repressiyalarnı toqtatmağa davet ettiler.
Redvan Suleymanov 2016 senesi iyül 30-da Aqmescitniñ ava limanında yaqalandı. Ağustos 12-de Rusiye FSBsi Rusiyeniñ kütleviy haber vastalarında Suleymanovnıñ sorğusı ve itirafları ile videonı cayrattı. Yaqalanğan, 2015 senesiniñ oktâbrinde Zaporojyede Ukraina istihbaratı tarafından verbovka etilgenini iddia ete. Suleymanovnıñ aytqanına köre, onıñ maqsatları sırasına arbiy tehnikanıñ areketleri aqqında malümatnı toplamaq kire edi. Ve daa soñra oña sanki Aqmescit demiryol vokzalı ve ava limanında patlatıcı tertibatlarnıñ qoyulması içün yer tapmaq vazifesi berilgen edi.
Ukraina Arbiy quvetleriniñ Baş ştabında Rusiye Federal hizmetiniñ bildirüvini inkâr eteler.
