Link açıqlığı

«Qırımlı diversantlar davasınıñ» mabusı Redvan Suleymanov 1 yıl 8 ayğa azatlıqtan marum etildi


Redvan Suleymanov, arhivden fotoresim

«Qırımlı diversantlar davasınıñ» mabusı Redvan Suleymanov istilâ etilgen Qırımda 1 yıl 8 ayğa azatlıqtan marum etildi, ve 3,5 millionlıq «zarar» ödemege mecbur etildi. Böyle üküm avgustnıñ 10-nda Aqmescitte Kremlge tabi olğan Demiryol rayon mahkemesinde qabul etildi, dep haber ete Qırım.Aqiqat muhbiri.

Avgustnıñ 2-nde prokuror «qırımlı diversantlar davasınıñ» mabusı Redvan Suleymanov içün 2 yıl apis müddetini rica etken edi.

Redvan Suleymanov 2016 senesi Siyülniñ 30-da Aqmescit ava limanında yaqalanğan edi. Avgustnıñ 12-de Federal havfsızlıq hızmeti Suleymanov sorğuğa çekilgen videonı Rusiye matbuat vastalarına yolladı. Yaqalanğan dey ki, 2015 senesi oktâbr ayında Zaporojye şeerinde ukrain istihbaratı oña iş teklif etti. Suleymanovnıñ aytqanına köre, oña arbiy tehnikasınıñ areketleri aqqında malümat toplamağa emir etildi, soñra ise patlav maddeleri qoyulacaq yerlerni Aqmescit vokzalında ve ava limanında tapmağa avale etildi.

Ukraina Silâlı quvetleriniñ Baş merkezi Rusiye Federal telükesizlik hızmetiniñ beyanatını red ete.

«Qırım diversantları davasınıñ» mabüsi Redvan Suleymanov mahkemede qabaatını tanıdı, lâkin büyük zarar ketirgeninen razı olmadı, dep haber etilgen edi.

XS
SM
MD
LG