Link açıqlığı

Saatnıñ esas haberi

Aqmescitniñ merkezinde Suriyege endirilgen darbe sebebinden Tramp, Mey ve Makronnıñ suretlerini yaqtılar (+foto)


Aqmescitteki tedbirde Trampnıñ sureti, 2018 senesi aprel 15 künü
Aqmescitteki tedbirde Trampnıñ sureti, 2018 senesi aprel 15 künü

Bazar künü, aprel 15-te, Aqmescitniñ merkez meydanında AQŞ, Fransa ve Büyük Britaniya tarafından Suriyege endirilgen raketa darbelerine qarşı narazılıq tedbiri esnasında bu devletlerniñ liderleri Donald Tramp, Emmanüel Makron ve Tereza Meyniñ suretleri yaqıldı.

Bunı Facebooktaki saifesinde ilhaq etilgen Qırımdan Rusiye Devlet Dumasınıñ deputatı olğan Ruslan Balbek bildirdi.

«Elbette, Ğarp liderleri bugünki fleşmobnı körmez, – olarğa «er şey tınç» ve «ğalebe bizim» olğanını bildirecekler. Lâkin bu, yañlıştır. Aqmescitte yapılğan bugünki tedbir, kimseniñ olarnıñ ağzında yaltaqçasına baqmaycağını, ve halqara uquq ile Ğarp demokratiyasınıñ Qırım gençleri arasında er kün reytinglerni coyğanını kösterdi», – yazdı Belbek.

Aqmescitte suretler yaquv tedbiri
Aqmescitte suretler yaquv tedbiri

Aynı zamanda, Qırım.Aqiqat muhbiriniñ bildirgenine köre, Rusiye cemiyetçisi İlya Bolşedvorov, Rusiye prokuraturasına toplaşqanlarğa qarşı «tedbirniñ qanunnı qaba surette bozup keçirilgeni» içün muracaat azırladı.

Onıñ fikrine köre, bu tedbir, «Rusiye birligi»niñ eñ yaman körüniş yaratuv ananelerine uyğun ucuz bir populizm»dir.

Cumaertesi, aprel 14-ke keçer gecesinde AQŞnıñ arbiy gemileri ve uçaqları Büyük Britaniya ve Fransanıñ arbiy-ava quvetleri ile birlikte Suriyedeki obyektlerge raketalar darbesini endirdiler. Amerika tarafınıñ bildirgenine köre, himiyeviy silânıñ işlep çıqılması ve istisal etilmesi ile alâqalı olğan işhaneler ve anbarlar ucümniñ nişanı oldılar.

Moskva, Ğarp devletlerini tsivil obyektlerge endirilgen darbelerde qabaatladı. Aynı zamanda Rusiye mudafaa nazirliginde, Hmeymim ve Tarturstaki Rusiye arbiy bazalaırnı mudafaa etken avadan mudafaa sistemasınıñ areket etüv zonasına iç bir raketa kelip tüşmedi, dep iddia eteler.

AQŞ, Suriyedeki darbeniñ, Duma şeerinde yapılması tahmin etilgen himiyeviy silânıñ qullanılmasına cevap olğanını bildireler. Moskva ve Damask himiyeviy ucümniñ olğanını inkâr ete ve onıñ aqqında haberlerge provokatsiya deyler.

XS
SM
MD
LG