Link açıqlığı

Saatnıñ esas haberi

AQŞ prezidenti Donald Tramp aprel 13 aqşamında Suriyedeki nişanlarğa avadan darbelerniñ endirilmesine dair emir berdi, dep bildire Azatlıq Radiosı.

Devletke televizion muracaatında bulunğan Tramp, darbelerniñ Suriyede himiyeviy silânıñ istisalı programması ile alâqalı olğan obyektlerge qarşı endirilgenini bildirdi. Amerika prezidentiniñ aytqanına köre, keçken raatlıq künleri himiyeviy ucüm neticesinde onlarca barışıqlı sakini öldürilgen Duma şeerindeki «qıyır-çıyır», «deşetli rejim tarafından himiyeviy silâ qullanuv teşebbüsleriniñ eskalatsiyasıdır».

Operatsiya yekünlegen soñ yapılğan matbuat brifinginde AQŞ mudafaa naziri Ceyms Mettis ve Ştablar rehberleriniñ birleşken komiteti rehberi general Cozef Denford, darbelerniñ üç obyektke endirilgenini bildirdiler: Damask civarındaki himiyeviy silâ işlep çıqılğan ilmiy teşkerüv merkezi, himiyeviy silânıñ parçaları saqlanğan anbarlar ve Homs şeeriniñ yanındaki Suriye ordusınıñ komanda noqtası.

Mettisniñ aytqanına köre, ittifaqdaşlarda himiyeviy silânıñ istisalı ve saqlanması ile bağlı olğan obyektlerniñ keniş bir cedveli bar. Olardan yalıñız üçü saylandı, çünki ittfaqdaşlar tarafından, barışıqlı eali arasında tesadüfiy qurbanlarnıñ olmaması içün hususiy bir ğayret kösterildi. Keçken sene Suriyedeki Eş-Şayrat bazasına 59 qanatlı raketa qullanılıp endirilgen darbe ile qıyas etilgende bu sefer «eki qat ziyade raketa uçurıldı».

General Denford, Rusiye tarafınıñ azırlanğan darbeler aqqında haberdar etilmegenini ayrıca qayd etti. Oña yalıñız mahsus alâqa hattı vastasınen, ittifaqdaşlarnıñ aviatsiyası Suriye üstündeki ava boşluğınıñ muayen zonalarında operatsiya ötkerecek, dep bildirildi.

Darbeler, qanatlı raketalar vastasınen endirildi. Operatsiyada olardan ğayrı uçaqlar iştirak etti. Rusiye özüniñ avadan mudafaa vastalarını qullanıp-qullanmağanına dair şimdilik malümat yoq. General Denfordnıñ bildirgenine köre, suriyeliler öz avadan mudafaa sistemalarını qullanmağa tırıştı.

Ucümniñ neticeleri aqqında tafsilâtlı malümat cumaertesi saba Pentagonnıñ matbuat brifinginde taqdim etilecek.

Kongresste raketa darbelerini endirmek qararına zıddiyetli qarşılıq kösterildi. Demokrat senator Tim Keyn, prezidentniñ qararına qanunsız dedi, çünki o, Kongressniñ sanktsiyasını almadı. Vekiller palatasında demokratlarnıñ başlığı Nensi Pelosi, Suriyedeki avadan darbeler, açıq-aydın, tolu mıqyaslı areketler strategiyasınıñ yerini tutamazlar, dedi. Cumhuriyetçiler, Suriye ukümetiniñ cinaiy areketlerini cevapsız qaldırmaq olmağanını qayd etip, prezidentniñ qararına qol tuttılar.

Ukümetke muhalif olğan «Beyaz miğfer»niñ vekilleri ve diger gruppalarnıñ faaliyetçileri, aprel 7-de Suriyedeki Duma şeerine helikopterden toksik gazlı bombalar atıldı, dep iddia eteler. Onlarca elâk olğanlar ve yüzlerce zararlanğanlar aqqında bildirilgen edi.

Ğarp devletleri Suriye prezidenti Başar Asadnıñ rejimi, Rusiye ve İrannı ihtimallı himiyeviy ucüm içün mesuliyetli sayalar. Damask ve Moskva himiyeviy ucümniñ olğanını inkâr eteler.

Aprel 12-de AQŞ prezidenti Donald Tramp, Suriyege qarşı darbe «ya yaqın vaqıtta, ya da asıl da yaqın vaqıtta degil» endirilmek mumkün, dedi. Bu bildirüv, Ğarp liderleri ihtimallı himiyeviy ucümge cevap olaraq ihtimallı darbege azırlanğanda peyda oldı.

Bundan evel Amerika prezidenti tvit yazıp, onda Kremlni Vaşingtonnıñ Suriyedeki darbesine azırlanmağa davet etti.

XS
SM
MD
LG