Rusiye Mudafaa nazirliginde, keçken gece Suriyedeki obyektlerge yüzden ziyade qanatlı raketanıñ uçurılğanını bildirdiler. Rusiye muessisesiniñ bildirgenine köre, Suriyeniñ arbiy ve tsivil infrastruktura obyektlerine raketalar darbesi AQŞ uçaqları ve gemileri ile birlikte Büyük Britaniya ve Fransanıñ Arbiy-ava quvetleri tarafından endirildi. Rusiye Mudafaa nazirliginde, ittifaqdaşlar 100-den ziyade qanatlı raketa ve «ava-yer» sınıfındaki raketelar uçurdı, dep bildirdiler.
Rusiyeniñ «TASS» haber agentligi, Rusiye Mudafaa nazirligine atıfta bulunıp, Rusiyeniñ Ava mudafaası sistemaları iç bir raketanı urıp tüşürmedi, çünki darbeler Rusiyeniñ Ava mudafaası quvetleri tarafından Suriyede imaye etilgen obyektlerge yönetilmedi, dep bildirdi.
Rusiyedeki menbalarnıñ malümatına köre, Suriyeniñ Ava mudafaası sisteması öz vastaları ile «onlarca» raketalarnı urıp tüşürdi.
Fransanıñ Mudafaa nazirliginde, AQŞ, Fransa ve Büyük Britaniya arbiy quvetleriniñ Suriyede ortaq operatsiyası aqqında Rusiyeniñ evelden haberdar etilgenini bildirdiler.
Aprel 14-te AQŞ prezidenti Donald Tramp, Başar Asad başlığındaki Suriye ukümetiniñ tsivil şahıslarğa qarşı himiyeviy silânıñ ihtimallı qullanılmasına qarşılıq olaraq Suriye arbiy obyektlerine endirilgen «noqtalı darbeler» aqqında bildirdi. Tramp, darbelerniñ Fransa ve Büyük Britaniya ile birlikte, bunıñ kibi kütleviy mahv etüv silâsınıñ qullanılmasını toqtatmaq içün endirilgenini ilâve etti.
Pentagon başlığı Cim Mettis, operatsiyada keçken sene qullanılğan silânıñ eki qat ziyadesi qullanılğanını bildirdi. O vaqıt AQŞ silâlı quvetleri prezident Başar Asadnıñ aviabazasına qarşı 59 «Tomagavk» raketasını uçurdı, dep bildire Reuters.
Reuters agentligi, Büyük Britaniya Mudafaa nazirligine atıfta bulunıp, qanatlı raketalarnıñ, Homsnıñ ğarp tarafında, ondan 15 mil uzaqlıqta bulunğan arbiy obyektke qarşı qullanılğanını bildirdi. Tahminlerge köre, o, himiyeviy silânıñ elementleri istisal etilgen yer ola.
Büyük Britaniyanıñ baş naziri Tereza Mey, Suriye ukümetine qarşı «küçniñ qullanılmasına iç bir ameliy alternativa yoq», dedi.
Rusiye, darbelerniñ «qarşılıqsız» qalmaycağını bildirdi. Aynı zamanda Suriye ile İran, ucümge «halqara uquqnıñ qaba bir bozuluvı» dediler. İrannıñ Tış işleri nazirligi, bunıñ «regional aqibetler»i olacağını bildirdi.
Fransa tış işleri naziri, Suriyedeki darbeler qanuniy, sıñırlı ve muvazenetli, dedi.
Ukümetke muhalif olğan «Beyaz miğfer»niñ vekilleri ve diger gruppalarnıñ faaliyetçileri, aprel 7-de Suriyedeki Duma şeerine helikopterden toksik gazlı bombalar atıldı, dep iddia eteler. Onlarca elâk olğanlar ve yüzlerce zararlanğanlar aqqında bildirilgen edi.
Suriyeniñ ukümeti ve onıñ ittifaqdaşı Rusiye bu bildirüvlerni inkâr eteler.
Duma – Şarqiy Guta bölgesinde, Damask yanında isyancılarnıñ kontroli altında olğan soñ şeeridir.
