Rusiye prezidenti Vladimir Putin AQŞ, Büyük Britaniya ve Fransa tarafından yapılğan Suriyedeki obyektlerge darbelerine «mustaqil devletke qarşı tecavuz aktı» dep, Vaşingtonnı «terroristlerge yüz berüv»de qabaatladı.
Rusiye prezidentiniñ fikrine köre, AQŞ «Suriyedeki hümanitar felâketini daa beter alğa ketire», ve olarnıñ areketlerinden barışıqlı vatandaşlar azap çeke.
Putin, Rusiye BMT Telükesizlik şurasınıñ sıradan tış oturışuvını toplay, dedi. Devlet başlığınıñ aytqanına köre, muzakerelerniñ mevzusını «AQŞ ve ittifaqdaşlarınıñ tecavuzkâr areketleri» teşkil etecekler.
Cumaertesi kününe keçer gecede AQŞnıñ arbiy gemileri ve uçaqları Büyük Britaniya ve Fransanıñ Arbiy-ava quvetleri ile birlikte Suriyedeki obyektlerge raketalar darbesini endirdiler. Amerika tarafınıñ bildirgenine köre, himiyeviy silânıñ işlep çıqılması ve istisal etilmesi ile alâqalı olğan işhaneler ve anbarlar ucümniñ nişanı oldılar.
Moskva, Ğarp devletlerini tsivil obyektlerge endirilgen darbelerde qabaatladı. Aynı zamanda Rusiye mudafaa nazirliginde, Hmeymim ve Tarturstaki Rusiye arbiy bazalaırnı mudafaa etken Avadan mudafaa sistemasınıñ areket etüv zonasına raketalarnıñ iç birisi kelip tüşmedi, dep iddia eteler.
AQŞ, Suriyedeki darbeniñ, Duma şeerinde yapılması tahmin etilgen himiyeviy silânıñ qullanılmasına qarşı cevap olğanını bildireler. Moskva ve Damask himiyeviy ucümniñ olğanını inkâr ete ve onıñ aqqında haberlerge provokatsiya deyler.
