Aprel 13-te Kyivdeki telükesizlik forumında Milliy telükesizlik ve mudafaa şurasınıñ (SNBO) kâtibi Aleksandr Turçinov, Rusiyeniñ ilhaq etilgen Qırımda ve Donbassnıñ Ukrainanıñ kontroli altında olmağan qısımlarında küçlü bir arbiy potentsial azırlağanını bildirdi, dep yaza Ukrainanıñ kütleviy haber vastaları.
Şu cümleden, Qırımda bugün küçlü bir arbiy potentsial yerleştirildi. Anda Qara deñiz flotu ve Rusiye Ava quvetleri diviziyanıñ diger qısımları ile birlikte 22-nci askeriy korpus buluna. Askerlerniñ umumiy sayısı 30 biñ kişini teşkil ete.
Turçinovnıñ aytqanına köre, yarımadada küçlü raketa sistemaları buluna. Şu cümleden yaqında anda Ukrainanıñ er bir noqtasında uçaqlarnı ura bilgen S-400 zenit-raketa komplekslerini ketirdiler.
2018 senesi aprelniñ başında Ukraina mudafaa naziri Stepan Poltorak, Rusiye Ukraina ile sıñırında 77 000-den ziyade kişilik 19 birinci ve ekinci eşelon batalyon taktik gruppasını yerleştirdi, dep bildirdi. Gruppirovkağa biñge yaqın tank, 2,3 biñ arbiy maşina, 1,1 biñden ziyade top sisteması ve qararnen 400 toplu surette atqan sistema kireler.
Daa evel Ukrainadaki NATO ofisi mudiriniñ muavini Ann-Kristin Bergene, Qırımnıñ arbiyleştirilmesi ve Qara deñiz bölgesinde Rusiye arbiy bulunuvınıñ kenişlemesi munasebeti ile endişe bildirdi.
2018 senesinde Aqyardaki Fiolent burnunda S-400 «Triumf» ava mudafaası zenit-raketa kompleksleri arbiy nevbetke turdı.
2014 senesinde Qırım ilhaq etilgen soñ Rusiye yarımadada muntazam surette arbiy talimlerni yaptıra. Ukrainanıñ Baş ştabında, Rusiyeniñ Qırımdaki areketlerine qanunsız deyler.
.
