İlhaq etilgen Qırımda Rusiye arbiyleri, arbiy tehnikanıñ sergisini teşkil etip, «Triumf» S-400 avadan mudafaa sistemasını (AMS) ve «Pantsir S-1» uçaqlarğa qarşı raketa-top kompleksini sergilediler.
Bunı aprel 7-de Rusiye Mudafaa nazirliginiñ matbuat hizmeti bildire.
Bildirüvde: «Tedbirni Cenübiy arbiy okrugnıñ AMS birleşmesiniñ komandanları keçire. Birleşme Qırım ve Aqyarda yerleştirilgen. Onıñ arbiy hadimleri S-400 komplekslerde ülkeniñ arbiy sıñırlarını qorçalav boyunca arbiy nevbet vazifelerini becereler», – denile.
Rusiye telükesizlik muessisesinde, S-400 ve «Pantsir S-1»den ğayrı sergige köçüci radiolokatsion kompleksler, sputnik alâqası sistemaları ve bunıñ kibi de radiotehnik ve zenit-raketa qısımlarınıñ diger tehnikası ketirildi, dep bildirile.
Tedbir, Rusiyede er yıl aprel ayınıñ ekinci bazar kününde qayd etilgen Avadan mudafaa ordularınıñ kününe bağışlanıp teşkil etildi.
Soñ eki yıl devamında Rusiye ilhaq etilgen yarımadanıñ territoriyasında bir qaç S-400 kompleksini yerleştirdi. Kremlde, Qırımda S-400 zenit-raketa kompleksleriniñ yerleştirilmesini «Rusiye-Ukraina sıñırında provakatsiyaları»nıñ ögüni aluv dep añlattılar.
Kyivde, ilhaqtan soñ Qırımda Rusiyeniñ arbiy mevcüdiyetiniñ arttırılmasına defalarca tecavuz areketi dediler. Ğarp devletleri de, Rusiye tarafından yarımadada arbiy talimlerniñ yaptırılması munasebeti ile endişelerini bildirdiler.
Rusiye, onıñ daa evelki S-300PM kompleksiniñ modifikatsiyası olğan S-400 zenit-raketa kompleksiniñ atış menzili 400 kilometr olğanını ve o, bir kereden 80-ge yaqın nişannı közete bilgenini iddia ete. Rusiye böyle sistemanı Suriyeniñ ğarbında daa 2015 senesiniñ soñunda Türkiye uçağı Türkiye-Suriye sıñırında Rusiye uçağını urıp tüşürgende yerleştirdi.
Halqara teşkilâtlar Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalar tatbiq etti. Rusiye, yarımadanı işğal etkenini red etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-sini, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
