Link açıqlığı

Saatnıñ esas haberi

Rusiye Aqyarğa S-400 raketa kompleksleriniñ ekinci divizionını ketirdi


Kefe yanında S-400 kompleksleri, arhiv fotosı
Kefe yanında S-400 kompleksleri, arhiv fotosı

Rusiye kütleviy haber vastaları, yanvar 13 cumaertesi künü S-400 «Triumf» avanı mudafaa zenit raketa kompleksleri Aqyardaki Fiolent burnunda «arbiy nevbetke turdı», dep bildireler.

TASS haber agentligi, Rusiye Arbiy ava quvetleri (AAQ) ve Avanı mudafaa quvetleriniñ (AMQ) 4-nci ordusı komandanı Viktor Sevostyanovnıñ sözlerini naqil etip: «Bugünden başlap, Qırımnıñ ava mudafaası grubu eñ zemaneviy, bütün dünyada misli olmağan «S-400» zenit raketa sistemi ile silâlandırıldı», – dep bildire.

Bir yıl evel Rusiye ilhaq etilgen yarımadanıñ territoriyasında S-400 komplekslerini endi yerleştirgen edi – olar Feodosiya etraflarına ketirilgen ediler. Ondan ğayrı, Rusiyeniñ arbiy muessisesinde FSBniñ iştiraki ile yapılğan diversiyalarğa qarşı talimlerniñ ötkerilmesi aqqında bildirdiler.

Daa evel Kremlde, S-400 zenit raketa sistemleriniñ «Rusiye-Ukraina sıñırında provakatsiyaları»nıñ ögüni almaq içün Qırımda yerleştirilgenlerini añlattılar.

Kyivde, Qırımnıñ ilhaqından soñ andaki Rusiyeniñ arbiy mevcüdiyetiniñ arttırılmasına tecavuziy areket deyler. Ğarp devletleri de, Rusiye tarafından yarımadada arbiy talimlerniñ ötkerilmesi munasebeti ile raatsız olğanlarını bildirdiler.

Rusiye, onıñ daa evelki S-300PM kompleksiniñ modifikatsiyası olğan S-400 zenit raketa kompleksiniñ atış menzili 400 kilometr olğanını ve o, bir kereden 80-ge yaqın nişannı közete bilgenini iddia ete. Rusiye Suriyeniñ ğarbında böyle sistemni daa 2015 senesiniñ soñunda Türkiye uçağı Türkiye-Suriye sıñırında Rusiy uçağını atıp yıqqanda yerleştirdi.

Halqara teşkilâtlar Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalar tatbiq etti. Rusiye, yarımadanı işğal etkenini red etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-sini, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.

XS
SM
MD
LG