İlhaq etilgen Qırımdaki rey berüv içün Rusiye prezdenti saylavını tanımamaq içün uquqiy sebep olğanına baqmadan dünya toplulığı bu adım yapmaz. Bunı Qırım.Aqiqat Radiosı efirinde Qırım siyasetşınası, Vernadskiy adına TMU dotsenti Yevgeniya Gorünova söyledi.
Siyasetşınas: «Halqara ameliyat ve Qırımnıñ ilhaqına munasebet noqtai-nazarından Rusiye prezidenti saylavınıñ tanılmaması mantıqlı olur edi. Lâkin bu, elbette, yapılmaz. Çetel közeticileri Rusiyege keldi ve, böylelikle, ceryannı qanuniyleştirdiler. Demek ki, dünya toplulığı Qırım sebebinden saylavnıñ ve Vladimir Putin qazanğan ğalebeniñ qanunsız tanımağa azır degil», – dep qayd etti.
Mart 19-da ABniñ tış işleri boyunca matbuat kâtibi Maya Kosyançiç, Avropa Birliginde Rusiye prezidenti saylavını, ilhaq etilgen Qırım ve Aqyarda rey berüvniñ tışında olıp keçken, dep sayğanlarını qayd etti.
İlhaq etilgen Qırımda protokollarnıñ 100%-i işlep çıqıldı. Şu anda faaliyet köstergen Rusiye prezidenti Vladimir Putin, saylavcılarnıñ 71,6%-i iştirak etken alda reyleriniñ 92%-inden ziyadesini qazandı.
Mart 19-da Kremlniñ kontroli altında olğan Aqyar şeer saylav komissiyası Rusiye prezidenti saylavındaki rey berüvniñ ilk neticelerini yayınladı. Olarğa köre, Putin, saylavcılarnıñ 90,19% seslerini qazanıp, birinci yerde buluna.
Mart 18-de Rusiyede ve onıñ tarafından ilhaq etilgen Qırımda prezident saylavında rey berüv ötkerildi. Resmiy Kyiv ve ondan ğayrı bir sıra halqara teşkilât ve bir çoq dünya devleti yarımadadaki saylavnıñ neticelerini tanımaylar.
Mart 19-da Ukraina prezidenti Petro Poroşenko, Rusiye tarafından ilhaq etilgen Qırımda keçirilgen saylavnıñ neticelerine «sıfır derecesinde» ve «uquqiy neticeleri olmaycaq», dedi.
İlhaq etilgen Qırımda Rusiye prezidenti saylavınıñ tanılmaması aqqında ABniñ tış işleri ve telükesizlik siyaseti boyunca Yüksek temsilcisi Federika Mogerininiñ beyannamesinde bildirile.
OSCE yanındaki Demokratik muessiseler ve insan aqları boyunca bürosınıñ közeticeleri, ilhaq etilgen Qırımdaki saylav bölüklerinde bulunmaycaqlarını bildirdiler.
Halqara teşkilâtlar Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalarnı tatbiq etti. Rusiye, yarımadanı işğal etkenini red etip, buña «tarihiy adaletniñ tiklenüvi», dey. Ukrainanıñ Yuqarı Radası 2014 senesi fevral 20 kününi, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
