Rusiye tarafından ilhaq etilgen Qırımda Rusiye prezidenti saylavı protokollarınıñ 100%-i işlep çıqıldı. Bunı, Kremlniñ kontroli altında olğan Qırım Saylav komissiyasınıñ malümatına atıfta bulunaraq, «İnterfaks» bildire.
Haber agentliginiñ bildirgenine köre, şu anda faaliyet köstergen Rusiye prezidenti Vladimir Putin, saylavcılarnıñ 71,6%-i iştirak etmekle reyleriniñ 92%-inden ziyadesini qazandı.
«İnterfaks», Qırım saylav komissiyasınıñ başlığı Mihail Malışevniñ sözlerini naqil etip: «Bu, ilk neticeler. Qırım saylav komissiyası territorial saylav komissiyalarından bütün protokollarnı alğan soñ olar tasdiqlanacaq», – dep bildire.
Onıñ malümatına köre, 994,5 biñ kişi, ya da saylavcılarnıñ 92,15%-i Putin içün rey berdi.
Kommunist fırqasınıñ namzeti Pavel Grudinin, seslerniñ 2,2%-ini alıp, ekinci yerni, LDPR lideri Vladimir Jirinovskiy 1,81% ile üçünci, Kseniya Sobçak («Vatandaşlar teşebbüsi») 1,65% ile dörtünci yerni qazandılar.
Mart 18-de Rusiyede ve onıñ tarafından ilhaq etilgen Qırımda prezident saylavında rey berüv ötkerildi. Resmiy Kyiv ve ondan ğayrı bir sıra halqara teşkilât ve bir çoq dünya devleti yarımadadaki saylavnıñ neticelerini tanımaylar.
Daa evel Ukraina TİNinde, Qırımda mart 18-deki rey berüv, qomşu Rusiye prezidenti saylavınıñ qanuniyliginde şübhe doğura, dep bildirdiler.
İlhaq etilgen Qırımda Rusiye prezidenti saylavınıñ tanılmaması aqqında ABniñ tış işleri ve telükesizlik siyaseti boyunca Yüksek temsilcisi Federika Mogerininiñ beyannamesinde bildirile.
OSCE yanındaki Demokratik muessiseler ve insan aqları boyunca bürosınıñ közeticeleri, ilhaq etilgen Qırımdaki saylav bölüklerinde bulunmaycaqlarını bildirdiler.
Halqara teşkilâtlar Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalarnı tatbiq etti. Rusiye, yarımadanı işğal etkenini red etip, buña «tarihiy adaletniñ tiklenüvi», dey. Ukrainanıñ Yuqarı Radası 2014 senesi fevral 20 kününi, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
