Rusiye Merkeziy saylav komilliyası, ilhaq etilgen Qırımdaki Rusiye prezidenti saylavında saylavcılarnıñ çoqusı Vladimir Putinge qol tuttı, dep iddia ete.
Bunı mart 19-da Rusiye devlet haber agentlikleri bildire.
Olarnıñ malümatına köre, mart 19, saat 00:30-daki vaziyetke binaen, Putinniñ neticesi Qırımda (protokollarnıñ 42,79%-i işlep çıqıldı) 92,25% ve Aqyarda (56,59% işlep çıqıldı) 90,23%-ni teşkil etmekte.
Kommunistik fırqasınıñ namzeti Pavel Grudinin, seslerniñ 3%-ini alıp, Qırımda ekinci yerge çıqtı.
Üçünci yerde LDPR lideri Vladimir Jirinovskiy buluna (2%-ge yaqın). Kseniya Sobçakta Qırımda 1,61% ve Aqyarda 1,26%. Qalğan namzetler 1%-den az saylavcılarnıñ seslerini aldılar.
Daa evel Rusiye MSKsı, Vladimir Putin «bütün devlet boyunca» bütün seslerniñ 76,67%-ini qazandı, dep bildirdi.
Mart 18-de Rusiyede ve onıñ tarafından ilhaq etilgen Qırımda prezident saylavında rey berüv ötkerildi. Resmiy Kyiv ve ondan ğayrı bir sıra halqara teşkilât ve bir çoq dünya devleti yarımadadaki saylavnıñ neticelerini tanımaylar.
Daa evel Ukraina TİNinde, Qırımda mart 18-deki rey berüv, qomşu Rusiye prezidenti saylavınıñ qanuniyliginde şübhe doğura, dep bildirdiler.
OSCE yanındaki Demokratik muessiseler ve insan aqları boyunca bürosınıñ közeticeleri, ilhaq etilgen Qırımdaki saylav bölüklerinde bulunmaycaqlarını bildirdiler.
Daniya, Estoniya, Latviya, Litva, Poloniya, Romaniya, İsveç ve Ukraina TİNleri, Qırımnıñ Rusiye tarafından ilhaq etilgeniniñ dörtünci yıllığı munasebeti ile otraq beyanatta bulundılar. Metinde, Avropa tış işleri nazirleri «Qırımğa, dünyadaki kün tertibinden ğayıp olmağa yol bermezler», denile.
