Mart 19 saat 6 vaziyetine köre, Rusiyeniñ Merkeziy saylav komissiyası (MSK) prezident saylavı bülletenleriniñ 99,75%-ni işlep çıqtı.
İlk malümatqa binaen, faaliyette olğan Rusiye prezidenti Vladimir Putin seslerniñ 76,67%-sini qazanmaqta. Ekinci yerde Kommunist fırqasınıñ namzeti Pavel Grudinin (aman-aman 12%), üçünci – LDPR lideri Vladimir Jirinovskiy (aman-aman 6%) ve dörtünci yerde «Vatandaşlar teşebbüsi» fırqasınıñ namzeti Kseniya Sobçak (1,5%-den ziyade) keleler.
Mart 18-de aqşam Putin Moskvadaki Manejnaya meydanında öz tarafdarları ögünde çıqış yapıp, olarğa, qol tutqanları içün minnetdarlıq bildirdi. O, Rusiyeni «muvafaqiyet bekley», dedi.
65 yaşlı Vladimir Putin, asılında, 1999 senesi dekabr 31-de sabıq prezident Boris Yeltsin istifa etken soñ Rusiyeni idare etmekte. 2008-2012 yıllarında prezident vazifesine Dmitriy Medvedev saylandı. O vaqıt Putin baş nazir vazifesinde bulundı.
Mart 18-de Rusiyede ve onıñ tarafından ilhaq etilgen Qırımda prezident saylavı ötkerildi. Moskva vaqtı boyunca 21:00-da Kaliningrad vilâyetinde saylav bölükleri qapatıldı.
Resmiy Kyiv ve ondan ğayrı bir sıra halqara teşkilât ve bir çoq dünya devleti yarımadadaki saylavnıñ neticelerini tanımaylar. Qırım.Aqiqat metin yayınını alıp bardı ve Qırımda olğanlarını taqip ete.
Daa evel Ukraina TİNinde, Qırımda mart 18-deki rey berüv, qomşu Rusiye prezidenti saylavınıñ qanuniyliginde şübhe doğura, dep bildirdiler.
Fevral 16-da Ukraina prezidenti Petro Poroşenko dünya toplulığını ilhaq etilgen Qırımda kelecekteki Rusiye prezidenti saylavınıñ neticelerini tanımamağa davet etti.
İlhaq etilgen Qırımda Rusiye prezidenti saylavınıñ tanılmaması aqqında ABniñ tış işleri ve telükesizlik siyaseti boyunca Yüksek temsilcisi Федерики Могериниniñ beyannamesinde bildirile.
OSCE yanındaki Demokratik muessiseler ve insan aqları boyunca bürosınıñ közeticeleri, ilhaq etilgen Qırımdaki saylav bölüklerinde bulunmaycaqlarını bildirdiler.
Daniya, Estoniya, Latviya, Litva, Poloniya, Romaniya, İsveç ve Ukraina TİNleri, Qırımnıñ Rusiye tarafından ilhaq etilgeniniñ dörtünci yıllığı munasebeti ile otraq beyanatta bulundılar. Metinde, Avropa tış işleri nazirleri «Qırımğa, dünyadaki kün tertibinden ğayıp olmağa yol bermezler», denile.
