Kremlniñ kontroli altında olğan Qırım Yuqarı mahkemesi, qırımtatar milliy areketiniñ dört faaliyetçisi aqsız yerde para talap etkenlerinde qabaatlanğan «Veciye Kaşka işi» figurantlarınıñ sıñırlav tedbirine qarşı berilgen istinaf şikâyetini red etti. Muhakeme etilgenler apiste mart 15-ke qadar qalacaqlar. Bunı Qırım.Aqiqat muhbiri bildire.
Akem Galina Redko, muhakeme etilgenlerniñ mahkeme zalına ketirilmesi ve oturışuvnıñ açıq rejimde keçirilmesi aqqında muracaatlarnı red etti. Ondan ğayrı o, Bekir Degermenciniñ sağlıq vaziyeti aqqında vesiqanı ve Rusiye kontroli altında olğan Kyiv rayonı mahkemesiniñ qararında Kâzim Ametovnıñ şahsiyetini tayin etken malümatlarda yapılğan hatalar (başqa baba adı, başqa doğğan yılı ve başqa qabaatlav maddesi) aqqında delillerni nazar-itibarğa almadı.
Oturışuv esnasında akemge, işniñ baqılması vaqtında yapqan bozuvları içün üç kere red bildirildi. Neticede akem Galina Redko öz qararı ile birinci maqam qararını lâğu etti, lâkin muhakeme etilgenlerini apiste qaldırdı.
2017 senesi noyabrniñ 23-nde Aqmescitte Rusiye telükesizlik hadimleri bir gruppa qırımtatarlar – Kâzim Ametov, Asan Çapuh, Ruslan Trubaç ve Bekir Degermencini yaqaladılar. Olar Türkiye vatandaşından «aqsız yerde hususan büyük miqdarda para talap etüv»de qabaatlanalar. Olar Rusiye telükesizlik hadimleri tarafından yaqalanğanda qırımtatar milliy areketiniñ veteranı Veciye Kaşka yaramadı. Daa soñra qadınnıñ vefat etkeni belli oldı.
Yanvar 12-de Kremlniñ kontroli altında olğan Aqmescitteki Kyiv rayonı mahkemesi «Veciye Kaşka işi» figurantlarına tevqif muddetini eki ayğa uzattı.
Fevralniñ başında Rusiye advokatı Nikolay Polozov, Qırımda 2017 senesinde qırımtatar milliy areketi veteranı Veciye Kaşkanıñ vefatını mustaqil surette tahqiq etmege başlağanını bildirdi. Onıñ aytqanına köre, Veciye Kaşkanıñ ölümi – «onı qanunsız olaraq yaqalağan Rusiye telükesizlik hadimleri tarafından quvetniñ adden aşırı ve ğayrı-mutenasip derecede qullanılmasınıñ neticesidir».
